جزء السابع عشر : حاروغ
ابتسمت وقلت : فاش
؟
قال : سميتي حقيقية
مروان اعراب ..
كانت صدمة خلاتني
نسكت للحظات وبقيت فقط كنشوف فيه ، علاش قالي سميتو حقيقية ؟
قلت : ماعرفتش لاش
كذبتي عليا ولكن مسامحك ..
ناض وقال : مرة مرة
نصوني عليك نديرو شي قهيوة ..
قلت : فأي وقت حبتي
..
خرج وبقيت كنشوف
فيه وانا كنفكر ، علاش مقالش لي جبد الارشيف ؟ والاهم علاش عطاني اسمو حقيقية ،
دورت راسي عند حميد ورسمت فوجهي ديك ضحكة خبيثة وفهمت خطة كاملة ..
خشيت يدي فشكارة
قطعت ورقة من ضوسي وخليت صوتها اتسمع ، شفت بطرف عيني حميد لقيتو مقاد بركة ومدور
عينو لجهتي ، جبدت ورقة وداير راسي مخبيها خديت ستيلو ودورت كرسي وعطيت بظهري
لحميد ومع حطيت ستيلو فوق ورقة تاناض حميد بسرعة لعندي وقال : اش كدير ؟ ، كنت
عاطيه بظهر وانا راسم ديك ابتسامة لعينة وفخاطري كنقول : حمار أ حميد فشلت ليهم
خطة كاملة .. جريت ورقة باش تبان ليه كنت حاط فيها نقطة ، وباش نبين براءتي وانا
كنتصرف مع واحد ضاربت معاه البارح خنزرت فيه وقلت : سوق موك ؟! ..
تبدل فيه لون ،
وعرفني انني عقت بيه بل عقت بلخطة كاملة و عرفت حتى شكون حاك هاد خطة وشحال من
واحد متافق عليا ..
خرجت نتغذى وخليت
حميد مصدوم ، كليت مزيان بل داك غذا كنت كنحس بيه الذ غذاء كليتو فحياتي ، مشيت
لقهوة خديت "نوار" وشعلت كارو وكل شوية كنضحك اراسي ...
كان اتفاق داير بيناتهم بثلاثة
حميد ، والهام ، ومروان ، عطاني اسمو حقيقية ! حيث لاخرج ومات فغانكون انا متهم ،
قرر اغامر براسو باش تبان حقيقتي واكون عند حميد والهام دليل ملموس بأنني عندي
كتاب كنسحر بيه لناس ، وعلاش ماسولنيش على ارشيف ؟ حيث الهام قالت ان الارشيف فاصل
مكينش وعوض مايخوي جام غضبو فيا وماعندو تادليل ضدي غي شاك ان كتابي هو سبب قالو
نديرو خطة اقتلوا بها هاد شك .. ، انا ماعرفتش شحال من واحد متافق عليا بالضبط لكن
الهام باينة معاهم و حميد ديك ردة فعل لدار فرطهم كاملين ، يإيما بغى اشدني متلبس
او مكانش متافق على خطة ، مكانش باغي مروان اموت ...
بقيت اشاد راسي
وكنضحك بوحدي بحال مسطي ، معامن لعبوها ! مع راجل مهم ، كملت لكارو ورجعت بواحد
ثقة فنفس لمصلحة مع دخلة جاني اتصال ، طليت على نمرة لقيت واليدة ، شديتها وبعد
سلام ، قالت : صاحبك كيسول عليك ؟
قلت : شكون فيهم ؟
قالت : انا عارفة
صحابك هذا عمري شفتو كيقول سميتو مروان .. !
تصدمت مني جاب هاد
خينة عنوان ، قلت : عاد كان معايا فلخدمة اش بغى .؟
قالت : هاهو عند
باب راه كيطلب اهدر معاك
قلت : بلاتي .... ،
لكن مدات ليه تليفون ..
قال : كريم بخير .. حمد لله ..
ديك امانة لقلت نجيبها لك ، اه فلبيت واخا ندخل ؟ لا غي بغات واليدة ديالك تأكد
حدى ماريو ؟ امممم صافي شكرا وقطع ...
كان ابن زانية
كيهدر اراسو ، عاودت اتصال لكنه طفى تليفون ، دارت بي دنيا فديك لحظة وماعرفت
ماندير يإيما نخرج لعندو واصحابلهم غانمشي نكتب اسمو فلكتاب او اعرفوا انني فعلا
مخبي شي حاجة او نخليه ادخل لدار و اقلب على كتاب ومني القاه غانمشي فيها .. ،
بقيت واقف عند ساحة مصلحة وانا كنشوف فلباب خروج تم ندور عيني لباب مكتب ، كنت
حاير حيث هاد قرار لغاناخذ هو قرار حياتي ، قررت انخرج ونمشي بأقصى سرعة لدار ولي
ليها ليها ، زدت خطوة عند باب وغانتفاجئ باتصال من عند واليدة ، شديتها بلخفة واول
جملة قلت : واش خليتيه ادخل !
قالت : لا ، واش
بغيتي نخليه ؟ ..
قلت : لا متخليش
مهم تانجي انا ونعطيه امانة ...
قالت : انا بوحدي
فدار منقدرش نخليه اصلا مرتاحش ليه و ماعرفت علاش عطاني تليفون طافي !
قلت : دابا هو فين
..!!
قالت : سديت عليه
باب وقلت ليه تايجي هو اعطيك الامانة ، اجي بعدا شناهيا هاد امانة ؟
قلت : اش فلوس
كيتسالهم لي مهم ماتخليهش ادخل تانجي ..
قطعت عليها ، وطلقت
واحد شهقة طويلة بينات مدى خوف لكان فيا ، اضطريت نقول كيتسالني حيث مابغيتهاش
تخلع وتصاحبو شي شفار وهي بوحدها فدار ...
بهاد فعايل بينو
ليا نية ديالهم ، سيد متأكد أنني سبب فموت لمياء ، لكن ادخل لدار بدون اذن مني
وبدى اهدر اراسو فتليفون باش اصيد واليدة خلات دمي اغلي بلغضب ، اغلي لدرجة نفكر
نفرشخ حميد وسط مصلحة حيث هو وحيد لي عارف عنواني ،خرجت كميت كارو حدى باب ضبطت
بيه نفسي ، فديك لحظة اقسمت لو كان امر حقا بيدي وكون ماكتبتش بعض اسماء فلول لا
نسفت كل من في مصلحة ، بلاتي ماذا لو ... ، طاحت عليا فكرة خلاتني نجمد فبلاصتي
للحظات ، فكرة فجئات عقلي وخلاتني مصدوم وضاحك ديك ضحكة لكتجبد كل خبث فقلبي ، لحت
كارو ورجعت مكتب وانا هادئ ، كأنني عاد جاي من حصة "يوغا" ، خدمت عادي
كنحاول نبين حميد انني بريئ من كل ما نتُسب لي وصل وقت خروج خرجت بهدوء ، غي تأكدت
انني بعدت من انظار موظفين وانا نضربها بجرية لدار ...
دخلت لبيتي دغيا ،
سديتو مزيان وجبدت كتاب من حوايجي ، تلاحيت فوق سداري و تاصلت ببراهيم بغيتو أ أكد
ليا انه وصلوه فلوس ،
قال : وصلوا هاد عشية وغان... ..
قاطعتو و قلت :
صافي ، نقص هدرة بغيت نتأكد من واحد حاجة ..
قال : لي هي ؟
قلت : نعاود نكتب
اسماء فايت لي كتبتهم ؟
قال : قلت ليك
مستحيل !
قلت : والى عطيت
ملكية كتاب لشي حد اخر ، وعاودت رديتو لملكيتي ؟
يتبع .....
