جزء الأول : حاروغ
تأليف : Mohamed Amine
********************
هاد قصة إهداء لأعز أخت وداعمة لي من نهار أنشأت صفحة قصص بالدارجة المغربية ، مكينش شي بوسط مخلات تعليق فيه سوى نقدا او تعصباً حيت كنعطل الاجزاء او مدحا ، كانت معايا من اول قصة الفتها الى هادي لغاتقراوها دابا .. شكراً بزااف HaSna HaSna 😍😍
**********************
ملي كتولي حياتك بحال شي بغريرة كبيرة طيح
فحفرة تخرج منها وتعاود طيح فوحدة خرى ,مني كتشوف ان كل خطوة كتخطوها
كتحس انك غادي لأمام لكن واقع غادي وراء , مني
كيتسدوا جميع بيبان فوجهك وتقول فنفسك علاش انا من دون ناس ؟, مني كتشوف ان دنيا كحالت فعينك وكلشي راب عليك ... فبساطة عرف ان اسمك مكتوب " فـحـاروغ ".
**** **** **** **** ****
سميتي كريم عايش فكازا مع واليديا و واحد اخت
صغيرة ، فعمري 25 سنة خدام موظف فمصلحة ضرائب ، كنت مقبل على زواج لكن مزال ماخطبش بنت ، قالت انها كتبغيني
وانها عمرها ماتخلى عليا ، وقالت واحد جملة فواحد تسجيل فواتساب درت عليه نجمة باش
كل مرة نتوحشها
نسمع قالت : يانتزوج بيك ياعمري نتزوج ، كانت فنظري ملكة جمال عالم ماعديش مع كلام
حب وكلام رطب لكن فعلا كانت كتحمقني ..
دازو يام وشهورا ، ومع مدة حسيت انها كتبعد
عليا ، ولات قليل فاش كتجاوبني ، ومني كنستفسرها كتقولي ماسمعتش تليفون او كان
طافي ، حسيت فعلاً ببعدها وهادشي جا بعدما خديت كونجي وسافرت لأكادير انا وشي
اصدقاء نبدلوا جو ، وقبل منسافر سيفطات لي ميساج
ابضحك وقالت : صافي اتمشي وتخلني ! لكن علاش
مدوزش كونجي معايا ههه ؟ .. من هاد نهار وهي مبدلة عليا ..
ضربنا واحد دورة فكل قنت فأكادير طلعنا جبال
وهودنا وكانت طريق كنقطعوها كلها اوطوسطوب وبيات كنطلبوا ضيف الله وحتى لا ملقناش فكانصبوا كيطون ونشعلوا عافية
ونعسوا فخلا كنا مغامرين هزين دوك شكاير كأنا توريست كنت انا وجوج من عشراني ولفنا
فكل عام ضروري
مانديرو هاد خرجة وبميزانية ماتفوتش 1000 درهم بل وكنتخاطرو شكون اخسر قل من هادشي
وكل عام فمدينة مختلفة .
دازت سيمانة هكا الى وصلنا لواحد قرية اسمها
أيت وارديم ، دزنا حدى واحد مكان فيه تراب وحجرة مصاف بحال قبورة بدينا كنطلعوا فوقهم فطريقنا لقرية ، الى خرج لينا
واحد شيباني بفوقية كيغوت بشلحة ، مافهمت والو ومني هدر بلعربية فهمنا اننا باركين نعفطوا
على قبورة قفزوا
صحابي دريكت خارج مقبرة ..،
اما انا فدرت رجلي فأقرب خوية واستغفرت الله ، بقيت غادي وكنتخطاهوم كنت
انا لخر فدراري وكنحاول ما امكن منعفط على تا قبر ،
قبورة مكانوش مصافين شي داخل فشي كأنها مقبرة
جماعية ، ومني قربت لدراري ضربات رجلي شي حاجة فتراب قلعتها ، هبطت عيني كيبان لي كتاب هزيتو ،ضربت عليه طلة
بلخفة و سديتو وكنت ناوي نلوحوا فاش نخرج من مقبرة ، لكن شي حاجة قالت غا حطوا
فشكارة وفعلا
داكشي لدرت ..
طلبنا من شيباني سماحة برك كيغوت وكيقول توما
ولاد مدينة مافيكمش لاحترام بسنا على يديه وراسو ، عاد ما سمح لينا ، استقبلنا
فداروعشانا وعطانا بيت فين نعسوا ، ومني خرج زكرم بيت حيث بقى عندو داك خوف اننا
غانشفروه ، بقينا داوين مع عشران وغي بضحك نقز صاحبي سمير وقال : دبرنا عليها من دوك موتى ليوم غانحلموا بيهم
ولا اجيوا انتاقموا منا ، بقينا ضاحكين شوية ، الى ان فكرني معاد ، وقال : اش درتي
مع سارة ؟
وبحكم هوما عشراني كنحكي ليهم على كلشي ، جبدت
تليفون تاصلت بها مجاوباتنيش قلت : امكن نعسات ، طفيت تيليفون و نعسنا ..
فهاد ليلة حلمت راسي مع راجل كيعطني كتاب حليتو
ولقيت فيه بزااف اسماء على شكل جدول ، شفت فيه وقلت اش هادشي ؟
سد لكتاب وحط فوقوا ورقة مكتوب لفوق
"مــلــكــيــة" مزوقة بل حمر ، اما كتبة لتحتها فمامفهوماش كان بلغة
غريبة ، مد ليا ريشة وحط حداية مداد حمر اشبه بدم ، ومافهمتش كيفاش تتحركات يدي ووقعات ....
فقت فصباح بكري قبل من صحابي واول حاجة درت
جبدت شكارة وضربت طلة على كتاب ، غطى ديالو كحل واملس بحال
جلد حية و وراق صفرين قدااام ، صفحة لولة عامرة بلكتبة
بلغة ممفهوماش ، ولاخرين وراق فيهم جداول فكل صفحة جدول فيه خمس خانات , فوق كل
خانة كتبة وجدول كولوا خاوي ، وكانوا 13 ورقة بلحساب .. طاح فبالي ان هادشي سحر
وتخربيق كيدار فقبور لكن جاني فضول غريب نفهم اش فيه ...
حل شيباني باب فطرنا شكرناه وخرجنا وفطريق وريت
لدراري لكتاب وقلت ليهم اني لقيتو فمقبرة ، بداو تيقلبوا فيه وقالوا هادشي اتخربيق
، مني شفتهم مامسوقينش مازعمتش نحكي ليهم على حلم وارودوني ضحكة واقولوا انني
كنأمن بخرافات ، رجعت كتاب لشكارة وقلت من
بعد ونتفرغ ليه .. دوزنا ديك عطلة ورجعنا
بحالنا لكازا كولا وشغالتوا ..
تاصلت بسارة
قلت ليها : رجعت ..
قالت
لي : على سلامتك وسكتات ، كان جوابها بارد فيه بزااف اجوبة تحتو ، قلت ليها بغيت
نشوفك ؟
قالت : ماشي دابا ..
قلت : واخا ، ومابقيتش سيفط ليها والو قلت
اوكان حتى تبرد دازو يام بحال هكا ونهار على نهار كنزيد نتأكد انها مابقاتش كتبغني
، فواحد مكالمة
قلت صارحني ، بدات كتهرب من جواب وكتقول امتا تجي تخطبتي ؟
قلت : قريب ولكن علاش وليتي باردة ؟
قالت : غي كيتخايل ليك ...
حليت فيس ديك ليلة وبان لي فجنب واحد جروب ديال
جن وسحر درت ليه rejoindre وتقبلت
فبلاصة كان جروب فيه كثر من
700 الف عضو كولا وفاش كيسول ، طاحة فبالي
كتاب قلبت وسط ماريو وكنت مخبيه فحوايجي صورتو وطلبت تفسير ، وتسنيت من ادمن اقبل منشور ، تقبل منشور دازت
دقيقة وجاني ميساج بحال هكا "امسح منشور انا غانشرح لك " ،
قلت : علاش ؟
قال : هي دير لي قلت ليك !
مسحت منشور وقلت : يلاه شرح ؟! ..
قالي : قبل خاصنا نتفاقوا
قلت : علاياش ؟
قال : باش نوضح ليك بلي انا معقول والى كان
كتاب اصلي فليلة لولة حلمتي راسك كتمضي عقد ملكية كتاب ..
هنا شداتني صدمة ، اوواااه باش عرفها بقيت ساكت
للحظة .. وكتبت : واخا شنو هو اتفاق ؟
قالي : غانترجم ليك جوج سطورا لولين فابور ،
باقي 2500 درهم لفقرة ..
ضحكت فخاطري وقلت : واخا ارى فابور هو لول ..
قال : خانة لولة كتب فيها اسمك ، وثانية كنية
وثالثة اسم الاب ورابعة اسم الام كتبهم فصفحة لولة وبقلم رصاص حسن ليك ..
جبدت كتاب ودرت داكشي لقال ، قلت : اييه و من
بعد ؟
قال : تسنى ..
سديت فيس وانا كاعما مصدق لهاد تخربيق لكيقول
تاصلت بسارة نسول فيها لكن مجاوباتنش طفيت تليفون ونعست ، وفصباح مع خرجت من دار غادي لعمل طاح عليا برابور ....
يتبع ......
