قصة "لقرينة لكحلة" كاملة

قصة "لقرينة لكحلة" كاملة

كاتب :   Mohamed Amine

دخلنا لداك لبيت اول ماشت داك راس معزة لمعلق عل حيط وتحتو "محمود" سوداني بارك عل واحد حصيرة من جلد ثور داير عمامة فوق راسو ولابس جلابة كحلة وهاز تسابيح فيدو

.. باين عليه وقار ومن وجهو اتكون عندو كثر من ستين عام رحب بينا دخلنا وكان كدوي بعربية فصحى حيت عرفنا جينا من مغرب تال سودان على قبل غراض وكان معنا مرافق اسمو عمر تاهو من سودان ... بعد سلام دخلنا فموضوع دريكت وقالينا محمود "اذا كنتم تريدون حقا الكتاب فعلى من يريد ان يتعلم ان يرفع يده" ضربت فكتف حليمة وقلت ليها هزي ايديك هزات ايديها وقربات لعندو وقاليها "مُدي يدكِ" مدات ليه ايديها بقى كيتمعن فيها شي خمسة دقايق تم ابتسم ليها ودخلو واحد بيت .. شفت انا فحميد راجلها ودويت بدارجة باش عمر مايفهم والو ...

- حميد اتخلي مرتك معاه !!


- ماتخافش راه ولد شي والي هذاك عارف بينو وبين الله ماعدو مايدير ليها
قلت فخاطري الله انعل أُمِّي تاع بوك تيقتيه عارف بينو وبين الله وكيعلم عباد الله سحر ..
قبل مانطلقاو بمحمود بركنا فسودان شي شهرين بضبط في احدى قرى بخرطوم عاصمة ... ديك ساعات كان عمر كيقولينا بلي توما مامستعدينش تلقاوه حيث جوهركم مليئ بذنوب خاصكم حتى طهرو انفسكم من ذنوب بصلاة واذكار وصدقات عاد امكن لكم تلقاوه ... مافهمش انا هاد جوهر شنو هو ماجيت فين نسول عمر حتى قالت لي حليمة علمني صلاة تصدمت من قالت هوكا عندها كتر من تلاتين عام ومكتعرفش تصلي عارفها امية لكن ماشي تال هاد درجة حتى حميد راجلها ماقدرش اقولها ليا كان كيشوف فيا كنعلم حليمة بعد سور صغيرة وحركات صلاة وتسبيح الخ ... شهر لولاني تعلمو مزيان وماحسيتش براحة تجاه هاد محمود خفت ايكون شي نصاب تاني حيت مشينا "لمالي" و"لتشاد" و "لغينيا" وكانت اكبر شمتة هي لف "تشاد" فاش قالنا واحد دجال خاصكم تشيرو بوبريص بخمسين مليون فمدينة "مونكومو" عند واحد عطار ووصفو لينا مزيان طبعا انا رفضت وعرفتو غي نصاب لكن امية ديال حليمة وحميد جروني بزز مني باش نمشي معاهم وحليمة هي مولات قرار حيت فلوس فيديها شراو بوبريص صغيييكُر قالك فيه حكمة باش تعلم سحر ... مني رجعنا لقينا داك دجال غبر مشينا لمدينة مونكومو حتى عطار غبر حيت كان داير غي فراشة ... شمتنا ولد كلب
حليمة مابغاتش ترجع بيديها خاويين عيينا معاها انا وحميد ووالو ...
هي فاش تلاقيت بهاد عمر بصدفة ففيس بوك في احدى جروبات ديال ماورئيات تعرفت عليه وحكيت ليه مشكل قالي كيعرف واحد سيد فسودان وبقى كيحلف ليا ا حتى تيقة ... قلتها لحليمة ودغيا طرنا لسودان ... تلاقينا بعمر فشهر لول هي فاش علمتهم صلاة الخ ... وشهر تاني بقيت لاصق ف عمر ادوي ليا على محمود داكشي لسمعت منو تصدمت فيه ...
سيد كيمدح فيه وكيمجدو وقالك هاد محمود معروف فسودان كيقضي معظم وقتو يتعبد وكيتصدق وصيام كل اتنين وخميس ونوافل لكن لزاد صدمني فيه وعرفتو كذااب من قالي وصل لدرجة من تعبد حتى ولات كتجيه نفحات ربانية (استغفر الله) استغربت منو تا مالو (نبي) عرفت هاد خونا متناقض بزااف حيت حنا جايين اصلا على غرااض خيب هو ان حليمة بغات كتاب تعلم لسحر الاسود وجميع نسخ ل قينا فالانترنيت مزورة (وهادي قصة خرى غانعودها لكم من بعد) خليتو كدوي حتى سالا وماقلت والو لحليمة حيت عن نفسي تملكني فضول نعرف شكون هاد محمود ... بعد مواعيد وليوم غدا تلاقينا معاه دخلنا واحد بيت بحال قاعة انتظار وعطنا واحد سيد سطولا قالينا توضاو توضينا ومد لكل واحد فينا تسابيح قالينا استغفروا الله بيما ايجي بعد ساعة تقريبا جا ودخلنا لعندو كان واقف عند باب دخلات حليمة لولة عاد حميد عاد انا تالت وقفني وقالي "اعلم انك تشك فيا لكن سأريك برهان بإذن لله" صدمني بهاد هدرة ماعرفت كيفاش عرف اني شاك فيه ومالقلتها لتواحد دخلنا لواحد ممر ضيق عاد خرجنا لبيت لكبيرة وخليت محمود وراية هي فاش شفت داك راس ماعز معلق عل حيط هبطت عيني بان لي محمود مريح فبلاصتو تخلعت عاد خليتو وراية وداك ممر مضيقة كيفاش داز !! .. شفت فحليمة لقيتها كتمتم "بتسليم" ..
رحب بينا الخ .. و دخلات حليمة لواحد بيت مع محمود بعد سيمانة ماشفنهاش كنسول عمر كيقولي راه فخلوة وخاصها تكون مستعدة باش ترضي عليها ملك لجان واعطيها لكتاب وبقى كيقولي بلي داك كتاب كان فعهد نبي سليمان ولكتبو احد ابناء ابليس لعنه الله وعطاه ليهود باش اتعلمو لسحر ويهود نسخو منو نسخ قليلا وكانو كيعطيوها لخدامهم من جان وخاص قربان غالي الا بغيتو ملك جان اعطوه لكم قلت لكم هاد خونا متناقض وبزااف عاد قالي نفحات مات نفحات وخونا محمود من اكبار اعوان شيطان "يعلمون ناس سحر" ..
نهار تامن خرجات حليمة وقالت لي سير جيب 10 جرام من بخور "لبان" فمدينة خرى وصيت حميد ابقا مع مرتو ليغبر تاني محمود ومشيت نجيبو انا وعمر لقيت لجرام ب 5000 درهم ديالنا ماعدي ماندير شريتو ليها ورجعت تاني عطيتو ليها ودخلات لبيت بقات تما شي شهر هي و محمود وحميد نفسو باردة كاعما كيسول فيها وانا درت شي صداقات فسودان وليت كنعرف شي دراري وكنريح فقهاوي مرة مرة حتى صونة تليفون الو سربي جي راه حليمة خرجات مشيت كنجري دخلت لداك لبيت بان ليا محمود وحميد وواحد سيدة لابسة عباية كحلة عطياني بضهر قلت : حليمة ؟ دارت عندي ماعرفتهاش اواااه مالها ضعافت ووجها تكمش عنقاتني وقالت لي أمين توحشتك عنقتها وكانت خانزة بريحة بحال ريحة حلبة شفت واحد كتاب باينة عليه قديم حداها وقالت لي غدا غانرجعو لمغرب فرحت مشات غسلات حالتها نهار لغنشدو طيارة بدا كيوصوني محمود شي وصاية غريبة لمبوقلت فيهم والو ...

حليمة ماهية مي وحميد ماهو با .. حليت عينيا فخيرية برباط يامات مؤطرة سعاد وفوزية وجميلة كان جميع اطفال متخلى عنهم كنعيشوا حياة مزرية ضرب من استاذة و باركين علينا غي عدس ولوبيا كنكلوا تلاتة وجبات فطور كاس اتاي خبز وشوية لدام وغذا وعشا عدس او لوبيا وفليل عمري عقلت على راسي نعست شي ليلة مقادة مني كنعسوا كيتصرف ديك لوبيا كتولي ريح مع كتر من عشرين واحد فغرفة كبيرة ونظام الاسِرة واحد فوق واحد تحت كتسمع ملحون طززز هنا وطززز لهيه حتى كتولي لغرفة مضبة وريحة يااا سلام ...
صراحة توحشت سمير لوييِّن كان عشيري روح بروح ووحيد لكنلعب معاه ... غي ديما كتفارقنا مؤطرة سعاد مرا كبيرة وقريب تشد تقاعد كنت عزيز عليها من دون دوك دراري بعض مرات كتعطيني دانون وبيمو وتقولي انا لسميتك أمين وتبقا تلعب ليا بشعري كنت كنحس بإهتمامها كنت محبوب تا من عند جميلة وفوزية لكن سعاد كتهتم بيا كثر منهم وكان ديما سمير حاسدني وخا هوكاك كنتعامل معاه مرة مرة بشي نص بيمو لكيتعطني ...
كانت عندي ست سنين ديك ساعة بديت كنطرح اسئلة منين انا ومنين جيت ديما سعاد كترفض تجاوبني بحجة انا مزال صغير ..

.. مني درت عشر سنين ولينا تنقراو علوم (نشاط العلمي) اول درس كان هو تزاوج عند الانسان داك بلان باش نعرفوا من صغرنا بلي كلنا ولاد حرااام ... دازت ليام على هاد منوال وكترو طلبات على مدير من ازواج لبغاو اتبناو ونظم مدير يوم الأنشطة كيدخلو جميع دراري لقاعة وكل واحد كيريح بلاصتو شي كيرسم وشي كيلعب وفنفس وقت كيدخلو ازواج لمرزقهم الله بأولاد اختارو ... وانا كنرسم حتى حسيت بيد ناعمة كتحك لي شعري هزيت راسي بانت لي مرا لابسة داكشي مزير ومكياج وكحل فعينيها وجسمها مثير وداك لعجب لكيدير لشعر باش ابان لامع وخانزة بريحة ريحة كتبان صغيرة واخا هوكاك وحداها واحد صلع بوكرش عندو موسطاج ومغوبش ..
- حميد شوف شوف شحال زوين
قرب حميد وبقى كيشوف فيا وجاوبها بواحد صوت غليظ ولكنة معربنة
- لا لا معجبنيش انا بغيت شي ضراوي اكون قاصح بحال هداك احليمة (وشيّر بيديه لسمير)

حليمة ماتسوقاتش ليه شداتني من يدي داتني عند مدير باش اكملوا اجراءات تبني .. طبعا انا سوى وافقت او لا مغايدوهاش فرأي وانا صراحة بغيت نتفك من هاد خيرية .. بعد ربع ساعة كملوا اجرءات وعرفت راسي غانمشي عنقت سمير وسلمت عل مؤطرات وصلت لسعاد شتها كدمع عنقاتني وقالت غانتوحشك ومن تكبر شوية دوز عندي حركت راسي بواخا ودعتها وخرجنا ... عرفت حليمة شبعانة فلوس باينة غي  على  رانج روفر لواقفة قدام باب طلع حميد اسوق  وهي ريحات حدايا فمقعد خلفي بدات كتعرفني راسها ومرة مرة تلوح ليا شكلاط حتى وصلنا لجنب بحر وقفات طونبيل وهبطنا انا حليمة وحميد مشى ادخلها لكراج حلات لباب جردة قدها قداش ولبسين عاد باب لاخر ديال فيلا عايشة فنعيم فرحت تا انا غانعيش فهاد خير ..

سيمانة لولة تهلات فيا اشمنك يا لعب واشمنك ياخروج وماكلة لعمرني ماكليتها وحمدت الله من تفكيت من اللوبيا وعندها خدامة هي لكتكلف بي مني تخرج زعمت على حليمة وليت نتجاوب معاها بحال الام وابنها حتى هي موت ظرافات لطلبتها كتجيبها ليا كنت عزيز عليها وتقولي ولي تعيط لي "ماما" وتبدا تعنقني ونعس فحضنها دخلات لي لقلبي .. حتى وليت نسول كيفاش قبلات على حميد لديما مغوبش وقليل فاش تشوفو اضحك ...

مادخلاتنيش لمدرسة دخلاتني لجامع وليت نحفظ قرآن شوية وحروف حتى درت خمسطاش لعام وخرجت وشرات لي بيسي ووليت فمعظم وقتي مقابل العب وفيس بوك ...
طلع كلشي فراسي حسيت بقنطة وليت معزول حتى صحاب مكاينينش كاين تما غي كليمني كاعما كيخروجو طلبت حليمة نولي مشي معاها لخدمتها ضحكات ووفقات مشينا لجنب لبحر بالضبط لمولاهم عبد رحمان مع دخلة حسيت بخنقة ريحة خانزة و بيوتا فكاع لبلايص ملونين بزرق انا صحابني خدامة فشي شركة ساعة خدمتها شوافة ... دخلنا لبيت صغيرة بدلات حليمة حوايجها لبسات لبسة عمل كلشي كحل وبركت حداها وحميد كان عند باب كيدخل ناس وكليان عطاهم الله وفلوس ديما داخلة كانوا اغلبهم نساء هالي بغات راجل وهالي بغات تسحر لراجل وهالي لحسدات صاحبتها وبغات طلقها من راجلها ..مني كنت فجامع كان فقيه كيدوي على سحر لكن حليمة كتمارس غي دجل يعني طالقها على عباد الله وكتستغل بلادة ديالهم وكان عندها لسان وداك تخوفيش لكتعطيهم يإما بخور ويإيما بيضة مكتوبة عليها شي طلاسم ماشي طلاسم غي تخربيق .. باقي نعقل جات عندها وحدة باقة صغيرة كانت بغات لولاد كانت حليمة كتعطيها شي تخوفيش يإيما تحطها تحت مخدة تاع راجلها او تبخر بيها لفراش .. وكتقوليها بعد تلت ليام جي عندي بعد شهر مجابش الله قالت ليها حليمة بلي خاصك تباتي عند والي تلت ليام لكن ليلة ب 7000 درهم وافقات لمرى وبغات تبدا هاد ليلة غربات شمس ودخلاتها حليمة لواحد بيت جنب والي وكانت هازة جبانية شرباتها ليها وخلاتها متكيا تما خرجات عند حميد وقالت ليه بعد ربع ساعة دخل عليها بيما اشد فيها نعاس كل ليلة فديك تلت ليام كان حميد يضاجعها وغريب فأمر بعد تلت شهور فرحات رجعات لمرى وكتشكر فحليمة بلي ولات حاملة بولد حميد وهي معرفاش ...
هاد سوق عامر وسخ كاين بنادم قاري وكيدخل ليه اما أُمِّي راه معذور مابقيتش حامل نمشي معاها ودبرت على خدمة فواحد شركة واخا مامخصوصش لكن وليت نحشم نقول لحليمة عطيني خدمت وفلوس لكنصور كيمشيو فلبية و فبنات ليل ولجرني لهادشي بعض اصدقاء لعمل بقيت على هاد لحال حتى درت عشرين عام ...هنا غايطرى تحول فعمل حليمة بدات حملات تحسيسية على هاد دجالة وشي جمعيات حقوقية ناضت كتندد بداكشي لكيطرى فمولاهم عبد رحمان من تلويت للبحر بداك دجاج لكحل لكيدبحوا وازبال لفيه وسياح لمبقاوش كيجيوا ضغطوا على سلطات و تعتاقل شحال من واحد منهم حميد ودمروا بعض بيوتا لحدى والي وخلاو والي ههه قالك خايفين من اللعنة ..

دورات حليمة صرف وخرجات حميد لكن كليان مابقاش كيجي حيت اصلا تما دمر وولات دير لقاءات ففيلا لكن قلال وداكشي مابقاش مقنع حليمة هزات بيسي وجابتو حداية وقالت قلب ليا على كيفاش نتعلم لسحر لكحل (الاسود) اما تشوافشت مابقات موكلة (هي بغات اوليو ازورها ريوسة لكبار)
... بانت ليا متحمسة تانا ماعرضهاش حيت فضول تملكني نعرف هاد عالم .. قلبت فلول طحت فواحد يهودي وبدا كيشرح لي ان من اسهل طرق باش تعلم هي عن طريق هاد لكتاب "شمس معارف" ومخطوطات لفيه ووراني تصويرة غلاف لكتاب وبعض صفحات قلتها لحليمة وقالت لي سولو واش بغا ايبعوا وافق لكن بشرط نمشيو عندو اسرائيل حيت مكايتسيفطش كذبت على حليمة وقلت ليها مابغاش ايبيع حيت ماعطاتنيش خاطري نمشي الإسرائيل وقالي مني تجي نطلقاو فقدس داك بلان راه قدس ديالنا وهادشي الا ماغدرنيش قلبت فجوجل تاعييت وجميع نسخ لقيت مشكوك فيهم ناهيك عن مشايخ لحرموا قراءته لما فيه ايات قرآنية مقلوبة طبعا سوى حرام او حلال هادشي مكيهمش حليمة ..

 تلاقات حليمة مع افارقة وقالوا بلي كاين كتاب اخطر من "شمس معارف" ومكتوب بقلم ابن ابليس لعنه الله كل واحد كيسيفطها لقنت ... بعض رحلات الإفريقيا لقينا غي سحر "كابالا" وحليمة مابغاتش تزحزح عن رايها (سحر الاسود) باعت فيلا وطومبيل وشرات برطما فكازا

ونصبو عليها فكثر من نص داك مبلغ مشينا لسودان ولاحت داكشي لشاط

بقى عندها غي مبلغ قليل وعاد لقينا لكتاب لفغلافو مامكتوبش عنوان وطلبات مني انا نقراه حيت مترجم ترجمة حرفية من اللغة عبرية للعربية وانا خاصني لاقي جمل وقبل مانبدا نقراه خاصني ندير وصية لولة لعطاني محمود لهي نحفر قبر ديال شي ضريح اكون مدفون كثر 100 عام ونقطع سبابة وابهام ليفيديه بجوج ونطحنهم فمهراس ونبدا نردد شي اسماء كتبهم لي فورقة وبدا كيصر عليا نديرها كيقولها واعاود اقولها علااش ماعرفتش !! وهنا فين غاتبدا ضربنا لقرينة كحلة ....

مني غانجيب ليه انا ضريح مدفون كتر من 100 عام .. عطانا محمود لكتاب فواحد صندوق وطلب منا منحلوه حتى نفذ وصايا و طلعت لطيارة وطريق كاملة ساهي كنفكر فوصايا محمود وكنقول الا كانت وصايا بهاد بشاعة علم الله اش غادي اكون فلكتاب ...

وصلنا لمطار محمد خامس وشدينا طريق لبرطما لفكازا حطينا حواجينا ورتاحينا شوية واخا عيني ماشفت راحة بقوة تفكير .. لغد ليه لصقت حليمة تعاود ليا اش طرى فداك شهر لكانت مريحة مع محمود قالت غي جلسات روحية باش نستاعد نطبق داكشي لفكتاب
- ومالك ضعافتي ووجهك تكمش ؟
- كنت كانكول جوج تمرات فنهار ولماء باش اقيس ملك جان صبري واعرف بلي انا مستعدة نقدم ليه روحي على قبل داك كتاب وكان كيدوي معايا بسيفت داك راس ماعز لكان معلق فلحيط تخلعت فلول لكن مع لقاءات ليوم وغدا ولفت ..

كنسمع ليها ورهبة راكباني حليمة لدخلات لبيت ماشي هي حليمة لخرجات دابا كدوي بتيقة وجهها ولا كيخلع حتى حميد مابقاش حامل انعس معاها فنفس لبيت ..
دازت تلت ليام درت على كاع لمقابر وقبات لفكازا لفيهم الاضرحة لكن محروسين عندهم عساسة وكلاب وحليمة مابقاش حاملة تصبر قلبت فانترنيت لقيت شحال من ضريح ولكن مشكل واش مدفونين كتر من 100 سنة او لا تارخيهم مبهم

طاحت عليا واحد فكرة هي نسول شي مرشد سياحي مشيت لجامع ملك لحدى لبحر وبان ليا توريست كيتسركل تما بقيت نضور وكنقلب حتى بان ليا شي كور
مجموعين على واحد خونا باين عليه كبير فسن ومعلق بطاقة على عنقو يعني هذا مرشد معتمد بقيت تابعو شي ساعتين حتى تفك من توريست وتبعتو وقفتو قلت ليه فلول بغيت نسولك وقف بقا كيعبر فيا وقال ماشي وقتو وكمل طريقو مشيت عاودت تبعتو ووقفت قدامو ومديت ليه ربعالاف ريال عاد قاليا سول نعاماس ... سولتو
- قالو ليا كاين شي ضريح قديم فجنوب مدفون من قرن 18 لكن ماعرفت لا اسمو لا فين كاين (انا غي درت راسي عارف) ..
بقى كيخمم شوية عاد جاوبني
- اه ... فقرية محاميد فطاطا اسمو "سيدي بورج " كان والي صالح فعهد عثمانيين وكان ...
مشيت وخليتو كيهضر وطرت عد حليمة فرحات وقبل مانشدو طريق عطات حليمة لحميد فلوس باش اشري طومبيل 205 قديمة ورخيصة هزينا رحيل "ولبلا وفاس" حيت باينة رحلة اتكون طويلة ..

لغد ليه فليل شدينا طريق ماوصلنا لمدينة طاطا حتى طلع صباح سولنا ساكنة تما على قرية محاميد قالو لينا راها خارج طاطا بساعة ديال طريق وكلها لابيست بعد تمارة ديال طريق لقينا اخيراً لافتة مكتوب "محاميد" طلعنا لواحد جبل شوية عاد بانو شي ديورة مبنين من طين ومنجبدة ديال طريق لضربنا باينة قرية معزولة وواحد قبة مني شفتها لأول خطرى عرفت بلي هو ضريح لكنقلبو عليه ..
هبطت من طومبيل ومشيت قاصدوا سمعت صوت جماعي من داخل كيقراو قرآن حليت لباب من حديد بان ليا دراري صغار ووسطهم راجل كبير باينة ايكون غي فقيه من شافوني كلشي سكت وناض عندي فقيه بعد ما أمر دراري اكملوا قرايتهم .. سلم عليا بل ابتسامة وقاليا بلي تا ماشي من هاد دوار
قلت : اه وطالبين ضيف الله
قال : مرحبا بضياف الله
استقبلنا فدارو احسن استقبال كلينا داكشي لقسم الله ووقت صلاة كنصليو جماعة فجامع حتى وصل لعشا طلب حميد من لحسن لفقيه شي دويرة نكريوها حيت عندو بنات فدار ودار صغيرة ومني كندخلو كيبقاو غي فكوزينة ...
دانا لفقيه لواحد دويرة جات فشتوكة كانت مهجورة ودار معانا 40 درهم لليلة وافقنا وبديت نفكر شي بلان كيفاش ندخلوا لضريح وخاصني بعدا ندير صداقات مع دراري ونكسب تيقة حيت كاين جامع عاد بيت لفيه ضريح. ووراه مقبرة ومعظم لوقت كيكون جامع عامر بدراري لكيقراو قرآن ناهيك عن صداقات كل جمعة وتبرك منو كتوصل لدرجة تعبد حيت اهل دوار كيحلفو بيه "" (استغفر الله) عندهم داك والي شي حاجة مقدسة فديك قرية مما غايصعب علينا مهمة وخاصنا ايام باش نعرفو امتى كيكون خاوي وامتى كيعمر ...

شهقت شهقة طويلة .. وقلت لحميد وحليمة لباركين قدامي مكاين ماحسن من ليل بنادم ناعس ودوار كايكون خاوي وغايساعدنا ظلام حيت دوار مزال ماوصلو ضو .. نهزو بولات وبالا ندخلوا لضريح ناخذو داكشي لبغينا ونشدو طريق

حليمة : اشمن طريق ؟ محمود قال نطحنهم فضريح ..
قلت : واخا
كنت مخطط نفذو هاد ليلة مع 12 بعض ما تأكدت بلي هو ضريح "سيدهم بورج" عاش فعهد فتوحات عثمانيين وتحرير قدس من صلبيين والخ والخ هادشي لقالي فقيه وكان كيعاود لي وهو متأثر عرفت مامدى معزت هاد والي ليه لكن كيبقى هاد ضريح مكان لشرك بالله ومني دورتها فراسي عرفت لاش قال محمود ضروري والي اكون فايت 100 سنة حيت اماكن شرك عزاز على شياطين وعظامو هو اخر قربان ايتقدم باش تبت حليمة ولاءها ملك لجان وخدامو لإسمائهم مكتوبين فورقة ..
دقات 12 خرجنا ومشينا وحنا طافيين بيل باش تاحد مايشوفنا نقزنا صور ديال مقبرة تم وصلنا لباب ضريح دفعو حميد دخلنا وسديتو وراية ...
شعلت بيل لفيدي وضويت على ضريح .. كان مزخرف بداك توب لمعلق على صندوق من خشب حيدنا ثوب ولحنا صندوق وهنا كانت صدمة
...
"واش هذا قبر ولا ضالة" كان قبر مدفون بل بوصلان وفيه شي جوج مترو يعني تمارة ديال حفر بلفاس شافت فيا حليمة وقال شنو معمول ؟ .. قلت ابدى حميد الى كملنا ليوم هو هداك ماكملناش نأجلوها غدا ... داكشي لطرى بقينا كنتناوبو انا وحميد فلحفر حتى ربعة ونص كيقرب اوذن لفجر حيت غايفيق لحسن فقيه جمعنا داك بوصلان متناثر وردنا صندوق وتوب لبلاصتو وخرجنا ... بقينا على هاد شي تلت ليام مني قربنا بلاصت تراب (يعني هرسنا بوصلان وقربنا لتراب عاد نبداو حفر) ولينا كنسمعوا بحال شي حد كيتمشى خارج ضريح وبعض مرات شي حد كيّشر بلحجر على باب كان ديما كيقفزني مني كتخرج حليمة مكتلقا تاواحد ..
ليوم رابع هو اخير بديت كنترعب نفس مابقاش تطلع ووقت كيدوز بزربة شفت فحميد قاصح ولديما مغوبش هاهو دابا وجهو صفر وكيترعد حسيت بشي حاجة خيبة غاتوقع ...
دقات 12 هزيت ماتيريال فساك و خرجت وانا متردد وصلنا لصور مقبرة نقزتو انا لول سمعت صوت حميد كيقول "شوف شوف " هزيت عيني بان ليا وجه خارج كيطل من باب ضريح كيضحك لينا ودخل ... تخلعت وبغيت نهرب لكن شداتني حليمة مني يدي بقوة بقوة ماشي قوتها لدرجة حاولت نهرب منها وماقدرتش ونطقات بصوت خشن ديال رجال " بورج مكل .. بوووورج مكل" وكتغوت وعينها تقلبوا كنطلب فحميد افوكني منها ساعة هرب ركبني رعب حاولت نقرى معوذتان فمي تلجم ...
بدات كتجر فيا ردخات باب ضريح بقوة ولاحتني وسطها درت بعيني نقلب على داك وجه مالقيتوش بركات حليمة عند باب كتردد "بوووج مكل" عرفتها اش بغات جبت لبيل شيرت ليها على وجها ولا كحل وعروق خارجين منو ... شيرات بصبعها عل ضريح انا مع خلعة فهمت كلشي .. هزيت لبالا وبديت نحفر نحفر نحفر حتى سمعت شي حاجة طرطقات ضويت على لقبر بانت لي بالا هرسات جمجمة والي لحت بالا وهبطت نحفر بيدي لقيت ايدو ليسرية هرست سبابة وابهام ولحتهم فمهراس وحليمة زادت كتغوت قلبت بزربة على ليمنيا لقيتها درت نفس شئ بديت نطحن وانا عاطي بضهر لحليمة جبت لورقة لعطاني محمود وحطيتها قدامي وبديت نردد 7 اسماء لفورقة " زلمبور ياذا كاف ونون اقرميط ميهدار ظاهر باطن غجلان"

طفى ليا بيل ومابقيتش كنشوف حاولت نخدمو ووالو شوية سمعت صوت حجر كيتضرب فباب ضريح هاد مرة بزااف ديال حجر وصوت خطوات بعاد بحالا كيجرو جهت باب شعري تشوك بلخلعة .. تحل لباب على غفلة وهو اتردخ وسمعت اصوات كيتكلمو باللغة عبرية شوية حسيت ببرد سخون على عنقي شي حد كيتنفس عليا تخطف لي مهراس من يدي وسكتو دوك اصوات واخر كلمة سمعتها هي "شالوم" وكتعني وداع او سلام باللغة عبرية

وخدم لي لبيل دورتو على غرفة نشوف واش كاين شي حد مالقيت والو مني ضويت على قبر ضريح تصدمت بانت لي حليمة مجبدة فلقبر .. ماعقلت على راسي حتى ضربتها بجرية خارج مقبرة وصلت فين مركونة طومبيل بان ليا حميد مزال مضارب معها مابغاتش ديماري ليه وقفت عند جاج شاف فيا قفز وتأكد بلي امين هذا .. وانا كنزاوك فيه احل لباب .. حل ليا باب وبديت نسب ليه فمو وطاسيلتو
علاش خلاني ... جاوبني وهو كيترعد واول مرة سمع منو كلمة ولدي
- سمحلي اولدي والله تاتخلعت وماعرفت ماندير
هدأت نفسي وقلت بعدا حمد لله من خرجت سالم طومبيل مابغاتش تخدم عيا معيا حميد نخرج ندفعها انا رفضت حيت مرعوب مزال صدمة مافتني .. بقينا هوكاك حتى بدات طلع شمس لا طومبيل بغات تخدم ولا واحد فينا بغى اخرج غفوة غفوة صغيرة فيقني صوت جاج تهرس قفزت بانت ليا حلمية ورى طومبيل وهي كتغوت "حلو باب " شاف فيا حميد وبدون تردد حل ليها باب وخرجت من طومبيل مخلوع تبعاتني حليمة وكتحلف متأدني عنقاتني وقالت لي والله ماعقلت حتى لقيت راسي وسط قبر ... شداتني من يدي ورجعاتني دفعت طومبيل خدمات وهربنا فحالنا لكازا فطريق عاودت لحليمة كاع داكشي لطرى بدات طلب سماحة وتقول انها ماعقلاش قلت ليها واش تي تسيطتي لبارح كنتي بحال شي شيطان .. كنت غانموت بلخلعة بقات كتملحس عليا وتبدا تفكرني ففضلها عليا وبعض مرات دموع تماسيح حن قلبي تجاهها حتى حميد بقى كيهدأ فيا وهو لبارح طار فيه نص كرشو دخلات شوية بعدا ..

تفكرت بلي بقات لي جوج وصاية ساهلين نوعاً ما وحدى كتعلق بقارئ لكتاب ولخرى بحليمة وعرفت بلي هادي غي بداية ...

تصلت ب عمر بديت نعاود هادشي لطرى وطلبتو ادوز لي محمود قالي محمود مكاينش فلخرطوم مشى لمدينة خرى اصالح خلاف طرى بين قريتين وراه باينة ايتعطل حتى هاتف مكيستخدموش حيت هو كيتصل غي برب عالمين

..

- سير الله انعل غماق تاع بوك وقطعت عليه

شوفي الحليمة محمود ماعندنا مانديرو بيه وداك جن لفيك باينة جبتيه معاك من سودان انا هادشي ولا كيخلعني ..

قاطعاتني وقالت : اصبح وافتح

مشيت لبيتي تكيت وغطيت راسي بمانطا واول حاجة درتها هي تفكير فكاع داكشي لطرى لبارح من غوات حليمة الى داك نفس على عنقي ... خلعة ماخلاتنيش نعس خليت ضو شاعل فلبيت وكنقرى معوذتان تحبس تفكيري

مني سمعت دقان فباب بيتي قفزت وبحركة لا ارادية غطيت راسي بمانطا ..

- حل ا أمين راني حليمة !

مال نبرة صوتها مختلفة !! هدأت نفسي وجاوبتها من ورى باب

- راه وحدة هادي شنو بغ... !

ماجيت فين نكمل لجملة حتى حسيت بشي ايد حيدات لي مانطا .. كان جسم عامر بدود واقف حدى ناموسيتي

طويل وراسو مفروق ماقدرتش نزيد نتمعن ترعبت ولصقت فلحيط .. شوية دوى داك جسم بواحد صوت تا حسيت بلحيط كيتحرك

 قال- "تعديت عن حرمتي وليوم لقصاص وليوم قصاااص" كيغووت وهاز ايديه ودود كيطيح منو ... وبزربة قرب لعندي وحط ايدو لزجة فعنقي لصقني مع لحيط وورك على رقبتي حتى مابقيتش قادر نتفس .. شفت شريط حياتي كيمر قدام عيني وعرفت بلي هادي هي نهايتي غانموت على يد مخلوق غريب .... شوية حسيت بشي حاجة باردة كتضرب وجهي حليت عينيا بانت ليا حليمة شادة فيدي وحميد كيخوي عليا لما ..

حليمة : بسم الله عليك اولدي حمد لله خير وسلام

اول حاجة فكرت فيها هي امتى نعست وانا ليل كامل حال عيني !! وشكون هذاك لوقف عليا ... هادي اول ليلة نعسها فكازا من بعد ماوقع داكشي فضريح تفكرت شكلو وكلامو وقصاااص مات قصاص وراسو مفروق ... هنا عرفت بلي قودتها عل جهد داك راس مفروق انا لفرقتو بالبلا من كنت كنحفر قبرو وعل ارجح لوقف عليا هو شيطان بسفت والي ...

بقيت على هاد حال يومين وفيما كنعس كنحس بسكرات موت كنت فكل نعسة كيوقف عليا وابقى اردد

ا"لقصاص" وبعض مرات مني كنكون فيق وكيبان لي راسو كيطل عليا فقنات باب ... كرهت حياتي بسباب حليمة  وهاد والي شيطان باينة مايتفرق عليا حتى اقتلني ...

قررت نفرتك هاد رمانة جحيم هانا عيشوا عينيا دخلوا حيت يومين هادي مانعست وقلت امكن الا قريت محتوى لكتاب اتفرق عليا كان ساعة عاشرة ليلا جبت صندوق لفيه لكتاب ودرت بوصية محمود تانية وهي لقارئ خاصو اكون على جنبة وداكشي لدرت حطيت لكتاب لقديم لمغبر قدامي وعلى يساري حليمة وحميد داير راسو ناعس فبيت لاخرى وانا عارفو مخلوع

حليت اول صفحة لكتاب بدون تقديم واول ست صفحات ليقيتهم كاملين كيمدحوا وكيمجدوا الأكبر فتنة عل الأرض الا وهي "مسيح دجال" صاحب عين واحدة ومن خلال ماقرأت فإن يهود كيتسناوه غي اخرج نقول لكم فقرة مختصرة " وعندها سيظهر ربنا و شفيعنا مسي... (استغفر الله هوما تيقولوا المسيح بلا دجال) سيخرج من اعماق بحار

ويسئل ملاكاً هل دنيا بخير فيجيب ملك قد كثر هرج ومرج فيأتي لنا ربنا وشفيعنا م... ويصلح الارض وما عليها " هو

غايدير عكس طبعا ...

قلبت صفحة سابعة وهنا غاتبان اولا رومانية كبيرا ومكتوبة وسط صفحة يعني شرط الاول هو "تدنيس كتاب سماوي" فكرت فلول نكذب عليها لكن الا كذبة اقدر تاني اتقلب عليا قلتها ليها بطريقة بغيت نخلعها وتراجع فنفس وقت

- ماما حليمة دنسي قرآن وانا نضمن ليك جهنم بدون حساب

شافت فيا شوفة معجباتنيش ومشات لبيتها هزات مصحف ودخلاتو لطواليط وسدات لباب بجهد مشيت كنجري لعندها ومن ورى لباب غوت وقلت ليها راه ماشي تما خاص بلاصة تكون مطلة عل لقمر هاتي سمعي " بعد تدنسيك لكتاب سماوي وسط نجمة سداسية شكل مرسومة بملح وتأكدك ان عاري بدن ردد كلمات تالية (لا داعي باش نكتبهم) ثم انتظر احد الخدام ..سمعت صوت لباب تحل خرجات حليمة وهازة مصحف فيدها شهقت وقلت بعدا حمد لله انأخرها شوية .. مشات فيقات حميد وقالت لي جيب لملحة غانمشيو دابا لغابة بوسكورة ....

مشينا لبوسكروة وانا فطريق كنقرى لكتاب قالك بلي مني تعرى وترسم نجمة سداسية وتدنس كتاب سماوي تبول عليه وتقطعوا .. حليمة قاطعة ايديها من رحمة الله لكن عمري توقعت تال هاد درجة لي تعطيها نفسها تدنس قرآن .. وصلنا لغابة قالت بقاو هنا وانا غانمشي بعدما شرحت ليها جميع تفاصيل وقلت ليها بلي اخر مرة جسمك اقيس لماء يعني اتبقى فنجسة مدى حياتها ... دخلات وسط ظلام حتى مابقيناش كنشوفها ... بعد ما دير هاد مراحل لقلت غادي اظهر ليها خادم ابليس نصفو انسان ونص لاخر حيوان وعندو قرنين كبيران كيميزوه غادي اقولها مكان فين غايتلقاو جميع سحرة مبتدئين بحضور ابليس لعنه الله يإما فخلا او كهف فاش غادي بان ليهم لغايتهئ ليهم فرجل صالح لابس بياض جميع سحرة غاويلو اضاربو باش ابوس ليه رجلو وتبرك منو بعد انتهاء من تبرك كلشي كيحيد حوايجو وكيبقاو امارسوا جنس قدام ابليس يإما رجل مع رجل او على شكل صفوف يعني واحد ورى واحد بعد انتهاء من زنى كل من سحرة مبتدئين كيحضر فإيدو طفل صغير باقي ماداز من مرحلة فطام وجابتو حليمة من احدى سبيطارات بعد ما دورات مع فرميلية تم كيشد كل واحد موس وكيذبح جنين واجمع دمو فإناء وكيتسنى دورو حيت خاص حتى دوز رجل ابليس لعنه الله على اناء دم عاد تشربو ثم يأمر قرين شخص او ساحر بظهور وكيبان لهم وكيدخل ساحر و قرين فخلوة لمدة شهرين كيعلم قرين سحر لساحر مبتدئ وفيك مدة كيتغدى ساحر على بول قرين او على داكشي لكيخرج من دبرو (خراء حشاكم) ...

ياع تفوو حسيت بإشمئزاز دازت سيمانة على هادشي والان حليمة فخلوة مع قرينها بعدما طبقات لفكتاب بلحرف هي فغرفة وفليل كنسمعو اصوات حيوانات امكن فمحاولة منها لتحضير جن كما هو مكتوب فلكتاب بديت نحس بقيمة ذنب لرتاكبت وداك شيطان مابقاش كيبان لي فحلمة من نهار دخلات حليمة لخلوتها تبعت عند راقي قالي بلي انا ممسوس وبعض جلسات بديت نحس براحة ... راحة ماشي لمدة طويلة ديما كنسمع انا وحميد لغوات فلغرفة ديال مرى وكتقول "عتقوني " كانت واحد غريزة كتقولي نحل باب لكن قبل ماتدخل حليمة نهاتني واخا اطرى لي طرى ماتحلش حتى تسالي مدة محددة ...
دازت ثلت يام حميد مابقاش قادر اصبر ترعب وقالي غانخوي دار ...
قلت الا مشيتي ديني معاك مانقدرش نبقا فدار بوحدي
خرجنا وكرينا برتوش بعيد عل برطما شوية واعترف لي حميد بلي تاهو كيوقف عليه فمنام راجل عامر كولو دود وعندو شي صباع مقطعين ديتو عند نفس راقي بعد سيمانة بدا كيتحسن ودبرت على خديمة فواحد محال باش نخلص فلوس لكرى لبرتوش وماناكلوا بقيت على هاد مدة وبديت نحس بلي كنعيش حياة طبيعية مشيت لخيرية نسول على سعاد لي مالقيتهاش شدات تقاعد طلبت مديرة جديدة تعطيني نعرفها غي فين ساكنة لكن رفضات بحجة اني غريب ... خرجت من مكتب مديرة وهي تبان فوزية كبرات وتجاعيد فوجها بانو وقفت قدامها فلول ماعرفتنيش حتى بديت نقولها انا امين لكنت فلخيرية الخ ... عاد عرفاتني قالت كبرتي اولدي سولتها على سمير قالت لي هرب من خيرية شحال هادي سولتها على سعاد شدات تقاعد وساكنة فدرب سلطان قالت برك هنا حتى نسالي خدمة ونديك ليها .

بقيت مريح شي ساعتين عاد خرجات وداتني عند سعاد فواحد دار باينة قديمة طلعنا مع دروج  دقينا باب لبروميان حلات واحد شابة سلامات على فوزية ودخلو وخلاوني عند باب .. شوية خرجات سعاد مقعدة باركة فكروسة اول ماشفتها عنقتها وبدات تبكي بعدما قالت توحشتك وسؤال عن حال واحوال بديت كل مرة نزورها وفيدي مقدية صغيرة بعد ماعرفت بلي هي اصلا كاعما تزوجات نهار ماتو واليدها خلاوها فديك دار وجوج خوتها تزوجو وكيزورها مرة فشهر وديك شابة بنت ختها كتزورها فاش تكون محتاجة شي حاجة بديت نحس بداك حنين لماضي مني كنشوف سعاد لفمتابة واليدة ديالي وبديت نسى حليمة دازت واحد مدة لمحسيتش بيها ... واحد نهار بضبط نهار جمعة مع حوالي 11 دليل رجعت من خدمة عيان دخلت لقيت حميد منشور كيتفرج فتلفازة .. خليتو ونعست واحد شوية كدخل فنيفي ريحة خانزة ما إن حليت عيني حتى سمعت دقان فلباب للوهلة اولى فاش شفت حميد قاد لبركة عرفتها حليمة ....

بقيت كنشوف فحميد ودرت صبعي على فمي زعما ششش سكت ... نقص حميد من تلفازة وخليناها كدق شوية قالت من ورى لباب : غي حلو راني عارفكم كاينين فداخل .. أمين حل
شاف فيا حميد وحركت راسي ب "اه" فهمني و ناض هو حل لباب وانا درت راسي ناعس فاش تحل لباب وهي ادخل واحد ريحة خانزة لدرجة كحبت وفرطت راسي كاعما ناعس ... حيدات عليا لمانطا شفت فوجهها ترعبت كان فمها عوج شوية ليسر وعين ليسريا بيضااا ومسدودة شوية وجهها كحال ولعظومة بارزين ولات كتخلع كثر من لول ...
عنقاتني وجاتني تقية من ريحتها واول سؤال طرحات علاش خويتو دار ..
قلت : سوليه هو (وشيرت بيدي لحميد)
حميد : كاعما خوينها عرض علينا واحد صاحبي نباتو عندو شي يامات ونرجعوا فحالنا
شافت فيه واحد شوفة وعرفاتو كيكذب حيت من وجهو باين متوتر ومخلوع ...
سولتها انا كيفاش عرفاتنا هنا ضحكات وشفت بلي جميع اسنانها كحلين وقالت : تعلمت اولدي أمين وقرينك هو لقال قريني فين كاينين !!
طلبتها تعاود لي اش طرى قالت ماشي وقتو يلاه نرجعوا لدار ..
رجعنا وعرفت بلي باب مصائب غاتحل ثاني وانا يلاه بديت كنحس براسي كنعيش حياة طبيعية ...
كانت ديك ليلة هي اسوء ليالي طلعنا لبرطما بعدما جمعت رحيل من لبرتوش ... حلات لباب وكانت فيه واحد خنوزية لدرجة الا بغيتي تنفس خاصك تخرج راسك من شرجم ماعرت كيفاش عاشت هنايا .. ريحنا فصالون وكاين بيت نعاس عاد كوزينة وباب بيت نعاس مقابل مع طواليط تقريبا بربعة خطوات ...
وانا كتناقش مع حليمة على حالها واحوالها وفرحانة حيت استقبلات سيمانة لفاتت اول كليان كان رجل اعمال لابسون عليه غايترشح فإنتخابات وضمنات ليه حليمة رباح وعطاها اموال طائلة (وهاهو الآن كيتبورد فبرلمان) وانا داير بالي معها كتصنت حتى كنسمع خطوات بحال حافر ماعز خارجين من بيت نعاس واول ماشت شي حاجة طويلة لايح على راسو مانطا مكيبان فيه والو ودخل لطواليط ... خبيت راسي ورى حميد حتى سد داك مخلوق باب طواليط ... وكنحلف ليه اما نزيد دقيقة فهاد دار ... قالت حليمة ماتخفاش راه غي "اقرميط" هذا !!
- اكون لبغا اكون انا والله مانزيد دقيقة فهاد دار
حميد : ترجل اولدي
- كيفاش انترجل ونتا كترعد حدايا واصلا نتا لطلبتي من لول نخوي دار
حليمة : خلاااص اولدي راه مغاديش ايئاذيك ..
نضت ومإن درت جوج خطوات جهت لباب سمعت صوت ما تخوى فطواليط ورجعت كنجري بركت بين حميد وحليمة ومغطي راسي تحل لباب طواليط ودخل داك جسم تاني لبيت نعاس وسد عليه ... كنت فقمة رعب شافتني حليمة فديك حالة وطلبات من حميد اجيب ليا كاس ما وكملات كلامها ب "الا شتي شي حاجة فلكوزينة سد فمك" .. فلول دار راسو ماسمعهاش حتى عودات لهدرة عاد ناض حميد ديما كيبغي دير فيها قاصح ومكيخلعش لكن ليدين ديالو مني كيترعدو كيفرطوه بحالا مريض بكزاز .. مشى دخل لكوزينة وجاب ليا كاس ما ...

شربت ما وهدأتني وكتقول لي والله اولدي مانقدر نعيش بلا بيك قلت فخاطري ( كون كنتي كتعرفي الله كاعما نوصلوا لكاع لهاد مواصل ) دخلاتني لبيتي وكانت بعيدة شوية على بيت نعاس طلبت حميد اجي معايا لكن بحركة من يد حليمة قالي هاني جاي ... دخلت لبيتي وخليت ضو شاعل سدات حليمة باب وبقيت كنتمشى ذهابا وايابا بإيما ايجي حميد وكنفكر كاع لو هربت حليمة غاتجيبني غاتجيبني حيث لقرين مكيتفرقش مع انسان حتى يموت فكرت حتى عيييت وقلت غدا نسول شي راقي او فقيه ... بعد ساعة ديال تفكير تحل لباب ودخل حميد كان شارد ذهن وريحتو ولات بحال حليمة للوهلة لولة فهمت فيلم وقلت لحميد ..
- ماتقلش ليا بلي ...
- ايييه اولدي قالت لي توحشات نعسة معايا
- ياك بعدا مادرتوهاش فبيت نعاس
- لا لا لا غي فصالة
- (طلقت واحد ضحكة مكتومة) .. نعستي مع جيفة اصحبي
- وتا راه جيفة هي لكاينة فلكوزينة
- ؟!!!!
- كتعرف واحد ولد زعر كيلعب ديما قدام دربا لورانية ماعرفت كاع ولد من ..
- عرفتو كيبان لي مرة مرة ولد كونسيّرج هداك !!
- راه منشور فوق طابلة لكوزينة معري ومقطع ليه راسو ومن دمو باين تدبح غي مؤخراً ..
سكت وجمدت فبلاصتي شكون ضمن لينا بلي حليمة جابتنا هنايا غي باش تذبحنا تاحنايا ... بدات كتدور لي بزااف الافكار فراسي منها مني تذكرت واحد فقرة فلكتاب بلي دم "زُهري" عزيز عند شياطين وداك دري اقدر اكون زُهري وتأكدت من نقطة وحدة هي انا حليمة درت مستحيل باش ترضي قرينها "أقرميط" ولو على حساب رؤوسنا ...

مجانيش نعاس كيفاش غايجيني وحنا عندنا شيطان فدار نهايك عن ريحة جيفة لكتجيب تقية بديت كنتقلب باش غي نغفو غفوة صغيرة ووااالو ... شوية و وسط هاد خنز كتدخل لنيفي رائحة شوى وكنسمع من بيتي صوت زيت كيتقلى
حميد : اش كيقليو هادو ؟
أمين : راهم باينة كيفصلو فدري ..
تكيت على ظهري وصدر ديالي كولو كيتحرك بنباضات قلبي مرعوبة ... دري مسكين مزال صغير ماعندو تا عشر سنين بلا شفقة بلا رحمة ذبحاتو حليمة !! ...

غدا غانهرب وطرى لبغا اطرى هادشي لقلت مع راسي تسنيت حتى تمنية صباح هزيت تليفون وشي فلوس كنت مخبيهم فلول كنت باغيها نقولها لحميد لمعرت كيفاش داه نعاس .. لكن تراجعت قلت نخلي معاها راجلها حسن مانمشيو عليها بجوج (وتاهو خلاني فضريح) تسلت حليت لباب بشوية غي بانو ليا دروج وانا نشدها 160 هبطت لزنقة مع دورة لولة ديال دريبة وهي توقف عليا مرى عينيها حمرين بدموع وراتني تصويرة وهي تقولي "ماشتيش اولدي هاد دري " تمعنت فتصويرة نفس دري لوصف لي حميد جاتني بكية قلت ليها "لا واليدة" واخا مسكينة حزات فنفسي .. كملت طريقي لمحطة وشديت اول كار خارج واخا ماعرفوش فين غادي مهم اني نبعد من كازا ...
سولت راكب لحدايا قاليا هاد كار غادي اكادير .. وصلنا مع 5 عشية هبطت وماعرفش فين غانمشي تمشيت شوية و بان ليا جامع بركت حداه تما حتى اوذن مغرب وندخل ليه ...
وذن توضيت فبيت لما لحداه دخلت صليت وانا كنتسنى غي امتى إمشيو ناس من حدى إمام باش نسولوا لكن بعدما صلاو لمغرب كيتجمعوا وكيقراو لحزب صراحة حسيت بواحد ضيق مني سمعت لقرآن وخرجت املا نرجع مع عشا خرجت بديت نضور نلهي وقت كنضور غي حدى جامع باش مانتوضرش ... شوية بان ليا لحية باينة عليه متاقي الله خارج من جامع قلت نسولوا وياريتني كون مادرتها ... وقفت عليه سلاام سلاام بغيت نعاود ليك مشكل قالي تفضل انا تكلخلت عاودت ليه من لول بان ليا مخلوع مني وصلت لجزء تدنيس كتاب الله وقف وقاليا لعنة الله وعليكم ياكفرة ابواب جهنم مفتوحة فوجهكم سوداء لعنة الله واعليكم ومشى فحالو وهو كيرددها بحالا عندك تا سوارت جنة ...
قمعني قمعة خيبة اترات فيا انا بغيت لنصحني ماشي احكم عليا بأحكام مسبقة وانا مزال ماكملت ليه
...قررت نأجل لقاء إمام لغدا حيت هاد بولحية تفكيرو محدود وخفت ادير لي إمام نفس شئ
مشيت كريت فواحد فندق بسيط هي غي دار حدى محطة كيكرو فيها لبيوت .. بعدما تعشيت فواحد محلبة دخلت وهو صوني تليفون بان ليا نمرة حميد قطعت عليه وطفيت تليفون وتكيت نعست ...

انا الان فلخيرية وحداية عشيري سمير وسعاد كتوجه فينا ونفس نهار لأنشطة بركت كنرسم تا حسيت بيد ناعمة كتحك لي راسي هزيت عيني بانت ليا حليمة صغيرة وزوينة مغوبشة وبصوت حنين قالت علاش مشيتي وخلتني .. وقبل مانجاوبها غرسات جوج من صباعها فعينيا بجوج دخلاتهم مزيااان لدرجة حسيت بلي صباع وصلو لمخي ... غوت بجهد فقت وكلي كنترعد عرفتها حلمة لكن الالم كنحس بيه ديال بصح فيِّقت مول شي لحل باب دغيا وقالي مالك اولدي ؟ قلت ليه والو والو غي حلمة وطلبتو اشعل ضو ؟ قاليا ضو مشعول ! ... وهنا فين تحشو ليا ركابي ..

مابقيتش كنشوف ظلام في ظلام حكيت عيني وقلت واقيلا راني مزال كنحلم صرفقت راسي وباقي ظلام جاتني نوبة بكاء وهزيت كفوفي لسما وكلت عليك الله ا حليمة .. سولني مول فندق على شكون هاد حليمة ! قلت ليه من بعد ونعاود ليك واش ممكن ديني ندوز على عيني !! شد دراعي وقالي يلاه مسكين وقف معيا ركبنا طومبيل وفطريق كيسول واش كان عندي شي مشكل فعيني كنجاوبو بنفي راك شتيني جيت عندك سالم غانم ..
وصلنا لسبيطار وبقيت كنتسنى شحال عاد جات نوبتي قالي طبيب بلي خاصك سكانير وكادير 1500 درهم خلصها مول فندق وجبناليه تصاور شافهم طبيب وكتب لي شي دوايات وخرجنا بركت انا فقاعة انتظار وعاود دخل مول فندق حيت طلبو طبيب على انفراد بعد خمسة دقايق خرج ورجعنا لفندق وفطريق كاملة كنطلبو اش قاليه طبيب من نبرة صوتو عرفتو كيكذب قال بلي خاصك تبع عند اختصاصي عيون واكون خير ...
دزنا من فرماسيان ورجعنا لبيت تكاني مول فندق فناموسية قالي واش عندك شي حد من عائلة نعيطوا عليه قبل ماتشرب دوى .. حركت براسي لا قالي غدا غاتعاود لي كلشي حيت كاينين شي دوايات كيجيبو نعاس شربني دوى ونعست ...

وسط ظلام سمعت صوت مألوف قال : بديت بعينيك وغانكمل ب"حمد" ... وسمعت خطواتها كيبتاعدو وهي كضحك بخبث .. شميت ريحت حراق انا مع ظلام ماعرت راسي واش ناعس او فايق شوية تحل باب لبيت لخلاه مول فندق محلول .. و دوى شي حد بنبرة مرعوبة قال "خرج خرج راه عافية شاعلة" طلبتو اعاوني حيت مكنشوفش هزني بسرعة وخرجني وسط دخاخن وبنادم كيغوت ... بقيت شاد فكتف داك شخص وهو كيوصف لي بلي فندق كيتحرق عيطو عل "بونبيا" بقات شي ساعة عاد جات بقاو مضاربين معاها حتى سمعنا اذان صلاة صبح عاد طفاوها ... شوية كنسمع صوت انتوي كيبكي وكيغوت بألم "باااا لاااا" سولت داك شخص عن سبب غواتها جوابو صدمني .. قال بلي هاديك بنت "حمد" مول فندق راه جبدوه ميت ... ك ... كيفاش ؟ طحت على ركابية وبديت نبكي .. عارف بلي حليمة هي لحرقاتو مالو هو اش دار ؟ شنو ذنبو ؟ علاش ماقتلاتنيش انا ونرتاح كاع من هاد عذاب ؟ ...

طلقت من داك خونا وبديت غادي وانا شارد ذهن ومكرهتش لموت فديك اللحظة ..
سمعت خطوات غادين وبديت كنعيط ورااجل واا ولد وااا لكيسمعني .. واش ممكن توجهني جامع قال مرحبا وشد من يدي ودخلني بركت فجامع و خلتهم تاصلاو تم عيطت وبلغواات عل امام اجي عندي فلول شدني شي حد بقوة وقالي "سير اسعاي خرج" حتى سمعت صوت كيقول "خليه خليه"
- سلام عليكم
انا : شكون نتا ؟
- انا هو إمام مسجد
- واش ممكن نخرجوا من مسجد ندويو على انفراد
قالي : شوف اولدي الا كنتي باغي نتوسط باش نجمع لك فلوس سعاية فأنا مكانديرش داكشي
- مابغيتش نطلبك على فلوس شوف نتا اخر وجهة غانمشي ليها الا ردتني فانتحار هو لبقى لي

سكت شحااال .. عاد نادى على احد اشخاص وقاليه قراو لحزب بلا بيا نمشي نقضي غي واحد غراض .. تم شد من كتفي وخرجنا من جامع بركني فكرسي وقال كولي اذان صاغية ...
شرطت عليه انه قبل مانعاود ليه اخليني تانكمل وفأخير اوجهني حيت عاودتها لواحد مني كنت كنشوف وقمعني ... قالي مني كنتي كتشوف ؟؟
- انعاود ليك وغاتفهم كلشي

بديت نعاود من طفولتي الى ان تعرفت على حليمة ومصايبها وهو بقى غي كيقول "لا اله الا الله" "لا حول ولا قوة الا بالله" حتى ختمتها بموت حمد مول فندق وقال "انا لله وانا لله راجعون" واش غي هاد فندق لتحرق عاد دابا قلت ليه : اه ! ...

قال غانمشيو دابا عند شيخ عبد الله وهو لغايرونا اش غانديرو وليت خبير فنبرات صوتية إمام حسيت من صوتو خيف بحالا تا حليمة اتعيق بيه وتقتلوا ..
شدني من يدي ومشينا بخطوات سريعة ركبنا سيارة وشدينا طريق وكان إمام كيدوي من تليفون مع شيخ عبد الله وقاليه جاي عندك دابا فموضوع مهم ...
دخلنا لواحد دار بعد تحية سمعت إمام كيعاود لشيخ قصتي وقبل مايكملها قاليه شيخ سكت وحط ايديه على جبهتي وبدا اقرى سورة بقرة ... مني كملها قال لإمام كمل حيت بْعد قريني لبعض لوقت وهو لكيوصل خباري لحليمة عرفت بلي هاد شيخ باينة عليه متمكن واقدر اعاوني .. كمل إمام قصتي ..
مد ليا شيخ ماء وقاليا شربو راه ما مقروء عليه .. شربتو وبديت كنرد شي حاجة صفرة وبعض شعيرات طواال على حد وصف شيخ وقالي بلي انا مسحور
خدم سورة بقرة فلموسجالة تاني وقاليا تصنت ليها مزيان وعندك تسهى بقيت مركز معها حتى سالات باش اتأكد بلي قريني مبتاعد عليا .. تم بدا كيشرح لي بأن سحر الاسود مكيحتاجش لشعر او ملابس شخص لبغيتي تسحر ليه يكفيها تنادي على قرينها تلبي طلاباتو تقدر تكون جداول فيها اسماء الله حسنى او بعض سور مقلوبة وعياذ بالله وهو البي طلابتها اقدر اقتل او اثر فصحتك كيما دار معاك وماكيكونش هو سبب مباشر فقتلك هو كيدير اسبب كيما دار مع مرحوم مول فندق قالي حل عينيك .. حليتهم وقال عينيك فبلاصتهم حمد لله واقدر بإذن لله ارجع ليك شوف مشكل لكاين هو سحر الا بغيناه نجبدوه خاصنا اكثر من راقي ...

موريتانيا مجتمع محافظ وفيه رقات متمكنين ان لم اقل محترفين منهم شيخ تميم وشيخ عبد المجيد هادشي لقالي عبد الله وهوما لي قدروا اساعدوني حيت اغلب رقات مغرب مايقدروش اتعاملو مع حالتي حالة مسحور بسحر الاسود .. صراحة رجع فيا هاد شيخ الامل ولكن مشكلتي هي مادة قالي غانعاونك لوجهك لله بديت كنتحسس فجسمو حتى وصلت لراسو وبقيت كنبوسو شكرتو وبديت ندعي معاه وقالي ان شاء الله غدا غانبداو رحلتنا ...

ودعت إمام مسجد بعدما شكرتو وبقيت مع شيخ عبد الله لتهلى فيا غذاني وعشاني بإيدو ووجد سيارة وبعض الامتعة باش نهبطوا لموريتانيا .. ديك ليلة فاش بت عندو رقاني باش منحلمش تاني دوك كوابيس

ونعست

..

طحت فرجل طيب ضيع وقتو ومالو حيت حس بيا وعرف داكشي لدوزت ماشي ساهل وكانت عندو واحد نبرة واتقة كتجلب لي طمأنينة لقلبي .. فيقني لفجر صلينا تم ركبنا فسيارة بعد ماودع مراتو وولادو وطول ديك يومين ديال طريق كان كيشرح لي خطورة داكشي لدرنا واتافق معيا انه غايحطني عند واحد سيد كيعرفوا سميتو ابراهيم منها اصلي رحم ومنها نتعالج فقرية "غولان" جنوب موريتانيا ...

وصلنا لقرية وكان جو سخوون بزااف .. سمعت شيخ كيسلم على ابراهيم تم دخلنا لاحدى بيوت كلينا ورتاحينا شوية ... لغد ليه سمعت شيخ كيشرح الإبراهيم حالتي بللهجة موريتانيا لكن كنفهمها وطلبوا انه اجمع ليه شيخ تميم وعبد مجيد والا كان شي شيخ اخر اكون احسن .. تاصل ابراهيم بشيخ تميم هو لول ووافق تم عبد مجيد ودارو معاه مور لعشى .. تسنيت بفارغ صبر مشايخ وجاو بعدما صلاو لعشى تم طلبو مني نمشي معاهم بحضور عبد الله ركبنا سيارة قربتا نصف ساعة ... تم دخلنا لواحد غرفة تفوح منها رائحة مسك بركنا بعدما اكدت ليهم على مشكلتي وبينت ليهم ندمي على كاع داكشي لدرت دوى احد مشايخ وقال "كلنا معرضون لخطأ" تم شدني من يدي وبقيت غادي معااه شحااال حيد لي حوايجي وغسلني مزيان و لبسني شي حاجة طويلة ورطبا ورجعنا لغرفة تكاني فلرض وحط مخدة تحت راسي وحط ايد على عيني وليد لاخرى على قلبي ونادى على شيخ تميم وتاهو حط ايد على جبتي وايد على كرشي وطلب من عبد الله اشد لي رجلي ..، بداو بسورة كهف تم ياسين وكل شوية كيحيد شيخ عبد مجيد ايدو من قلبي وابدى اخوي عليا ما فوجهي ... حسيت بشي حاجة سائلة خارجة عيني وكانت حاجة خرى كتطلع لي من معدة الا ان وصلات لحلقي وصعاب عليا نتنفس وداكشي كيطلع بشوية بشوية الا ان تقطع هواء حاولت نقاوم نتحرك ندير شي حاجة لكن مشايخ حاكميني فجأة ورك شيخ تميم على صدري وقف لي داكشي عند حلقي وغيِبت ...

حليت عينيا وكيبان ضو مجهد قلت واقيلا غي كنحلم .. حسيت بحقلي شحفان كحبت وهو ابان لي بحال زغب صغير خارج منو حنيت راسي لرض حيت شمس كان ضربالي فوجهي شفت حدى رجلي بانت لي راس قطة صغير بلا عينين ودم وشي حاجة صفرااا وبزاااف تاع رُزم مريوطين هنا فين تأكدت بلي كنحلم وكنتسنى تاني غي تبان لي حليمة وتنكدها عليا .. شوية حسيت بيد على كتفي قفزت دورت راسي بان ليا لحيا وجهو مبشور وكيتبسم قالي على سلامتك
قلت : شكون نتا ؟
قالي : انا عبد الله
طاحوا دموع من عينيا بدون شعور عنقتو بست ليه راسو ايدو سجدت حمدا لله مني رجع لي شوف وعبد لله كيردد هذا من فضل ربي شفت وراه بان ليا جوج رجال كبار باركين عرفتهم شيوخ وبست ليهم اديهم وعطاني واحد فيهم سطل وقالي توضا وصلي جوج ركعات خدتها وطرت صليت وكنت كنطول فسجدة غي باش نكثر من شكرا الله وهاد الاشخاص مني ساليت رجعت لهم تم بركت وسطهم سولت فيهم شكون تميم وشكون عبد مجيد عرفوني بنفوسهم تم قال عبد مجيد بلي مزال ماكملنا وتصدمت مني قال بلي داك راس قطة ورُزم جبدناهم من كرشك وهو لكان واحلي فحلقي ودم خرج لي من عيني سرطت ريقي وكمل كلامو بلي غاتبقا دير رقية لمدة سبع ايام باش نتأكدو بلي وليتي سليم وحتى انا كان فيك جني ومابغاش اتكلم سيخرج بأذن لله ....

دازت ديك سبع يام وانا عند كول رقية كنغيِّب ووفكل صباح كيقول عبد الله بأني كنت كندوي بصوت مرى وكتقول "هو ليا هو ليا بعدو منو بعدو منو" ومخرجوه غي بزز فليلة جمعة بعد مابذلو مشايخ جهد كبير ..
كانت داك يوم من اسعد ايام بعد كملت جلسات رقية عطاهوم عبد الله شي بركة لكن رفضو حيت دارو فيا خير ابتغاء لوجه الله رغم ان ملامح فقر مرسومة على وجههم .. بداو كينصحوني بلحفاظ على صلاة فوقتهم وفلمسجد وقراءة على اقل حزب فليوم واي تهاون مني راه غادي ارجع تاني داكشي وعطاوني واحد تلاتة بوديزات فيها ماء مقروء عليه قالي عبد مجيد خلطها مع ماء عادي وغسل جسمك بيها قبل ماترجع لبلدك وفيما تحس تاني بخاطرك مزير اغتسل تاني بلباقي وداكشي لدرت ...
نهار لغانشدو طريق رجوعا للمغرب شداتني بكايا ماكنتش باغي نتفرق على هاد ناس طييبين ليحيدو من عندهم باش اساعدوا لمحتاج وبدون مقابل كان سمعتهم معروفة بلخير عبد مجيد رجل كبير ذو ابتسامة ساحرة اما تميم فقليل كلام وكثير فعل دارو واحد مأدبة قبل مانمشيو تم توادعنا رجوعا للمغرب وهنا فين غايطرى تحول كبير فحياتي لأحسن طبعاً ولأسوء لساحرة حليمة ...

رجعنا لأكادير بركت عند شيخ عبد الله يومين ودار فيا خير اخر توسط ليا فخدمة عند واحد صاحبو فمحال كبير ديال اثواب ومعروف فداك سوق شكرتو بزااااف .. وخرجت كريت برتوش .. خدمة كانت فيها تمارة من سبعة صباح لتمنية ليل كنجي ونهار كامل وانا نهز فكوليات ونخوي سلعة ونبيع مع كليان وكنرجع مهلوك للبرتوش ومع حياة تزوفريت كنطيب ونصبن لراسي .. مع ذلك كنجاهد نفسي باش نقرى ولو حزب فكل ليلة ونفيق مع لفجر باش نصلي فجامع وكنت كنقول اللهم تعب وندي اجر عند الله ولا نفقد شوف تاني ومني استفسرت عبد الله قالي بهاد عمل (يعني قرآن وصلات فوقتها) كتبعد عليك لقرين وحليمة مكتبقاش عرفاني فين انا ! ...

داز شهر لول تخلصت فيه باطرون كيعطيني 1500 درهم وجا بسبت ونهار لحد كاعما كنخدمو ديك ليلة شديت لكار لكازا باش نشوف سعاد وكان واحد راس كيقولي ندوز عند حليمة لكن تراجعت غي تفكير فزيارتها حسيت بقلبي تقبض ..
وصلت لكازا شريت شي بيجامات وشي مقضيا ومشيت لدار سعاد حلات ديك شابة وبلا سلام قالت لي : فين غبرتي تال دابا ؟
انا : ياكما طرى ليها شي حاجة ؟
- لا لا لا الله احفظها .. راه مني مشيتي وهي كتسول فيك !
دخلت عندها غي شافتني وهي ترسم فوجهها معالم فرحة سلمت عليها وسألاتني على هاد غيبة وانا كنقول غي مع خدمة .. بركت معاها داك نص نهار وودعتها وانا خارج وهي كتدعي معايا ...

بقيت على حال مدة خمس سنين كنت كندوز عند سعاد مرتين فشهر حتى لخدمة وليت كنتقنها وولات واحد تيقة بيني وبين باطرون وفاش قرر اشري محال اخر وسط سوق وكلني انا نشرف عليه وزادني فخلصة وولات 4000 درهم ودرت معاه اتفاق نجيب سلعة ديالي نزيدها على سلعة ديالو ونبيعها فمحال ورباح نقسموه بنص قالي موافق وبقيت خداام وعند كل شهر كتحسن حالتي مادية بدلت داك برتوش وكريت برطما وشريت سيارة صغيرة باش نولي نقل بيها سلعة وكنت فيما كنمشي عند سعاد كندورها فنواصر تشوف ربيع ... فهاد مدة بديت نعيا كنجي من عمل عيان مابقيتش كنفيق لفجر ولحزب لكنت كنقرى وليت كنقرى غي صفحتين وكنحبس سألت عبد الله قالي عطي نفسك حقها لكن كنت غنأولها لحاجة خرى لدرجة كنقول برطما خاوية نجيب شي بنت ندوز معاها ليلة لكن صبرت وجاب ربي فرج على يد سعاد

واحد نهار وانا خارج مع سعاد وصلنا لبلاصة لكتعجبها جنب نهر جبت كروستها من كوفر وهزيتها وبركتها فيها وبقيت غادي كندفع فيها وقفنا وبقينا كنهدرو على يامات خيرية ولوبيا وبغض طرائف لوقعوا فيها وهي كضحك .. شوية سكتات ودارت فيا واحد شوفة فشكل وقالت : اولدي واش مناويش تزوج
انا : واش انا كرهت .. شكون لغادي تقبل بواحد ماعندو عائلة !
ضرباتني على كتفي غي بالضحك وقالت : ياك ديما كنقولك بلي انا ميمتك وربتيك على يدي !
- ههه صراحة واحد سؤال ديما محيرني فين لقولتني مليوح مني كنت صغير ؟
سعاد : جابك واحد سيد مني سولناه فين لقيته قال كنت غادي ماعليا مابيا وسمعت لغوات فلبركاسة حليتها وهو القاك ملوي فمانطا وكتبكي !
- هههه تاتي جيتني فاص وهاد برهوشة لولادتني مالقات فين تلوحني غي البركاصة
سعاد : هههه اوا ولدي راني قريبة نموت ومابغتش نكذب وماعرت علاش تا من دون دراري دخلتي لي خاطري ..
- ياكما تي ل لحتني ورجعتي لخيرية ودايرة راسك ماعرف والو هههه
- هههه اعوذ بالله راغي براءتك مني كنتي صغير كانت كتشدني ليك ( قدات بركة وكملات كلامها) انا عمري عرفت شي راجل وعانيت من كلمة بايرة سنين طواال وصبرت اولدي وهاد حالات بحالك ولفنها ولا اولد اقول بنت كانبغيك دوز شهرين تحمل منو وباينة اتكون تا واحد منهم
- ههه باش كتعجبني كتجني كوود مكترعيش ليا عارف راسي ولد حرام بلا تبقاي تعاوديها هههه
- دابا باركة ماتنسي فيا راها كاينة بنت ناس ونحلف ليك مالتقا فحالها ..
- شكون هادي ؟!
- فاطمة زهرة
- واش هاديك لكنلقاها عندك ؟
- اييه اولدي عندها حقها فزين وساترة راسها ونزيدك الا جمعنا ولاد خوتي بجوج عندهم 8 لولاد ووحيدة لكدوز عند هي فاطمة زهرة اش قولتي ؟
- مشكلتي هي عائلة نجي بوحدي ماجاتش
- ياودي ماتفكرتش فهادشي بنت من قولتها ليها واخا كبرتي فخيرية قبلات بيك نتا ماعليك غي تدوي معا باها وتشرح ليه وضعك ..يلاه نمشيو دابا نوريه ليك ...

شدينا طريق لدار فاطمة زهرة وصلنا عند باب صونيت طل واحد دري قالت ليه سعاد كلم باك .. دازت خمسة دقايق هبطت راجل كبير لابس فوقية وداير نضارة وفجبهتو درهم صلاة سلم علينا وطلبتو امشي معيا لسيارة باش نهدرو مرتاحين .. شرحت وضعي بلي كبرت غي فخيرية وماعديش عائلة وبغيت نتقدم لبنتو ومع سعاد ورانا بدات كتشكر فيا قالي بلي نسول بنت الا قبلات عطيني نمرتك نحدد معاك موعد باش نتمو خطوبة .. فرحات سعاد واقيلا كثر مني بنت كانت كتعجبني وعاطيا لكن عمري كانت بيناتنا شي هدرة مطولة كنت فيما ندخل عند سعاد كتخرج هي تبقى واقفة حدى باب تحتاني حتى نخرج عاد كتطلع ...

رجعت فحالي لأكادير قلتها لباطرون و لشيخ عبد الله لفرحوا بدوروهم وقالولي الا حدد لموعد قولها لينا نمشيوا معاك ... دازت يومين عيط الاب بنت قالي غدا انكونو نتسناوك قلتها لباطرون وعبد الله لوجدوا ريوسهم ومشينا بسيارة عبد الله ..
دازت ديك ليلة دغيا درنا خطوبة واتفاقنا على من دابا شهر نديرو عقد ونديرو شي عرس صغير جابت ليا سعاد نمرتها وبديت نهدر معاها وتعرفت على شخصيتها درويشة واخا بعض مرات كتجبد لي بلي عمامتها مقبلوش حيت مقطوع من شجرة لكن انا مايكهمنيش مهم تي قبلتي بيا ..
دازت شهر درنا عرس فرقنا فيه رجال درنا ليهم خطبة ولا اروع بحضور شيخ عبد الله كيضحكك وافيدك فنفس وقت وغد ليه عيلات قربلوها بشطيح ورديح واخا كانت لا تخلو من بعض نظرات احتقار من بعض عمامتها ..
قبل ماندي لبنت لأكادير فكرت فسعاد شكون لغايقابلها اتخاذت واحد قرار واخا بديت نحلف وهي تحلف بلي تجي تعيش معانا برطما واسعة وكاينة لبلاصة زيدتا متفاهمة مع مدام ومغالقاش معاهم مشكل قالت سير دوز واحد 15 يوم بوحدك معاها عاد اكون خير فعلا دازت ديك مدة وانا كانعيش مع مدام وعرفت فرق مابين حلال وحرام انا دوزت بنات ليل لكن عند نهاية كل ممارسة كنحس بواحد ولغمة وكنقول اخر مرة كدوز ربعيام كنجيب وحدة خرى اما حلال لعكس تماما
..
جبت سعاد وعاشت معانا ومع مرور سنين ولدات مدام ببنت سماتها "كلثوم" حيت عزيزة عليها هاد سمية درت برأيها وزادت فرحة فدار وحنا كنشوفو كلثوم كتكبر قدام عينينا دارت ثلث سنين وهو اشد فسعاد مرض قلب طاحت لينا ديناها لإنعاش ودى مول امانة امانتو حزنت بشدة اما فاطمة زهرة فكانت اتسطى صبرت حالي وقلت هادي هي سنة حياة فديك فترة بعد فراق سعاد قلت فيها ضروري خاصني ندير صلة رحم مع حليمة وحميد لمعرفتهم واش حيين او مايتين رجعت لكازا بوحدي وهنا فين انكتاشف صدمة ...

كانت ديك فترة بعد موت سعاد صعيبة بزااف وديما بنتي كلتوم كتسولني فيناهيا جدة ماكنعرف مانقولها تأثرت وطاح عليا واحد ضيم مابقيت حامل نهدر مع حد

فكرت فحليمة وحميد وقلت ضروري خاصني نسول فيهم دنيا وزمان هادي وماعرفنا شكون سابق ولو دوزتها عليا لكن مسامحها تاهيا خير دارت فيا فديك عشر سنين لماغنساهاش
قلت لفاطمة زهرة بلي غانمشي لكازا نقضي واحد غرااض قالت الله اعوانك ومشيت

وصلت مع ظهر غي قربت لباب تحتاني وانا تزير طلعت غي بروميان و وانا نحبس كنت متردد بزااف ونفس لخوف لحسيت بيه سنين هادي رجع تاني خرجت من دار ومشيت ديركت لحانوت شريت قرعة ما شربتها وريحت فطومبيل شوية بيما نسترجع انفاسي وقلت هاد مرة غانطلع ياربحة ياذبحة ... طلعت ووصلت لباب برطمة بقيت ندق ندق ولا مجيب .. شوية هبط واحد جار وقالي بلي تاحد مساكن تما قلت ليه مايمكنش كانت واحد لمرى وراجلها .. شاف فيا واحد شوفة ناقصة وقالي اش كاتجيهم ؟ قلت ليه كيجيوني من عائلة واش رحلوا ؟! قاليا لا لا اجي طلع معيا نوريك ... مشيت معاه لطابق فين ساكن وقفت عند باب وجبد لي واحد جريدة قديمة من ارشيف قالي قرى عنوان غي شفت عنوان وانا تصدمت (مختل يقتل زوجته وسبعة اطفال بحي "فولاني") (مختل هو حميد) سولتو امتا وقع هادشي قالي شي 7 سنين ومني قريت تفاصيل عرفت بلي حميد مشدود فلحبس "عكاشة" شكرت داك خونا ومشيت نشوف واش غادي اخلوني نزرو ولا لا

... وصلت لمؤسسة عكاشة فاش دخلت سولت واحد حارس تما قالي اتمشي لمركز استقبال مشيت ومالقيتش موظف تسنيت تال ربعة عاد جا ومابغاش اعطني وقت حيت دوك ملفات كثار ومافيه لقلب دورت معاه وبقى كيقلب بملف بملف حتى قاليا ذركني بإسم قلت ليه حميد "طوبي" قاليا بلي راه سيفطوه لمسشتفى عسكري لأمراض عقلية ببرشيد ..

مشيت تاني لبرشيد وكان قريب اطيح ظلام ولقيت مواظفين مكاينيش كريت ففندق املا نرجع غدا
... لغد ليه دخلت لمكتب عند طبيب مكلف قلت ليه جيت لزيارة مريض
قالي : سميتو ؟
- حميد طوبي
قلب فلملفات شوية وقالي عطيني بطاقة وطنية عطيتها ليه كتب شي تخربيق فورقة سينتها وعيط على ممرض باش امشي اديني ليه ...

قلبوني مزيان عاد دخلني واحد غرفة مجلجة وبركت فواحد كرسي وقدامي طابلة تسنيت شي ربع ساعة وجابوه لي مكبل .. نشف فمي من شتو كان نص وجهو ليمني مشوه بحالا مشوط ونص تاني فيه بقع زرgيين وشعرو تقرع .. بركوه قدامي وخلونا على انفراد وقالي ممرض الا وقعات اي حاجة عيط علينا ...

قلت لحميد : سلام .. ماردش عليا
وقالي : لاش جيتي !
حنيت راسي ومجاوبتوش
حميد : راني قلت ليك لااش جيتي ؟
- جيت نسول فيك
بدا كيبكي وكتبان لي دمعة كتكركب فتشوهات لعندو فوجهو وقال : لاش خليتني اولدي لااش ماتدتنيش معااك فاش مشيتي علاااش ..
- عند راسك كون هربنا بجوج اتخلينا (وبديت نحكي ليه قصة لوقعات ليا بعدما هربت)
بان ليا كاعما تأثرت وساهي وانا نسولوا على حليمة ..
حميد : هههه حليمة ههههه قال حليمة واش مكتشوفش هاهية حداية ! كان كيضحك بهسترية وكيردد حليمة حليمة وكيبقى ادور براسو بعنف حتى كنسمع عنقو كيطرطق
دخل ممرض ودك برة فكتف حميد لتهدن وقالي زيارة سالات وانا مزال ماجبت راس خيط اش وقع لحليمة ؟ فلخبر كاتبين بلي حميد مختل عقليا قتل حليمة وذبح سبعة لولاد ذبح من اختصاص حليمة وتأكدت بلي "اقرميط" عندو دخل فموضوع

رجعت عند طبيب لوصف لي حالتو قالي بلي مرض جا نتيجة صدمة واي محاولة باش تذكروا فلماضي كتزاد عليه حال وخرجات تحقيقات بلي لقاو اعضاء تناسلية ديال اطفال فلفريكو و جثة زوجته (حليمة) كانت بلا عينين ومبتورة رجل ليسرى مع وجود مقلاة وكامون وموس وشوكة مغروسة فيها احدى اعين حليمة فلكوزينة ورجلها لقاوها فلفران ومقطع منها طرف ديال لحم وهذا دليل على ان حميد كلاهم حاكموه بلمؤبد فهاد مستشفى عسكري لهو مراقب طبعاً

جبد ليا طبيب هاد ملف تحقيقات بعد مادا مني 1000 درهم وطلبتو غدا انعاود نزورو قالي واخا

دخلنا تاني على انفراد سولتو مالك مع حليمة بدا كيغوت هي لجبداتني هي لجبداتني هاهية حداية سولها ... عارف بلي حالتو ميؤوس منها فقررت نخليه رجعت لعند عبد الله وعاودت اش طرى سبقت كلامو بهادي خاتمة اعوان شيطان وعطاني فرضية وحدة وقالي بلي شيطان همو وحيد هو ادخل انسان جهنم فبعدما ضمن خاتمة حليمة لبينها وبين الله قرر اتفك منها باش انتاقل انسان اخر وارتفع درجات عند ابليس لعنه يإيما شعل فتنة بينها وبين حميد او دخل لجسم حميد ودارت فعلتو بديك طريقة بشعة ..

رجعت لدار وانا مصدوم بقى فيا حميد ديك تهمة قتل اطفال غي لفقوها فيه هو مادرهاش وبدى كيراودني شك على انه ماشي هو لقتل حليمة انا كنعرف حميد خوااف وغايكون حمااق حيت شاف شي حاجة واترات فيه بدات كضارب افكار فدماغي وانا نقول ربي هو لعارف اش دار بيناتهم عشت انا حياة طبيعية وبقات لي هاد وقائع غي من ذكريات وعند كل ركعة وسجدة كنحمد الله على اني خرجت منها سالم .
هاد قصة علماتني حاجة وحدة

 : •{ وَلَا يُفْلِحُ السَّاحِرُ حَيْثُ أَتَىٰۖ إِنَّمَا صَنَعُوا كَيْدُ سَاحِرٍ ۖ  وَأَلْقِ مَا فِي يَمِينِكَ تَلْقَفْ مَا صَنَعُوا }•

طه آية ٦٩

كاتب :   Mohamed Amine

#انتهى

ارائكم حول قصة غايعطينا حافز لكتابة ونشر مزيد سوى  نقد ا او تشجيعا مرحبا بجميع اراء 

Med

تابعنا على :

رابط صفحة كاتب شخصية Mohamed Amine:

صفحتنا على فيسبوك : قصص بالدارجة المغربية

instagram : قصص بالدارجة المغربية

Twiter: قصص بالدارجة المغربية