جزء العاشر : حاروغ
نقز عساس لحاضي داك شارع كان حدانا ، قال : ماشي طومبيلة لدخلات فيه
، راه مدير مني بغى احل طومبيلتو دوك جوج طومبيلات دخلوا فبعضياتهم وفلت واحد
"بنّو" منهم وجى فمدير ...
شافيا حميد وعينيه كيدمعوا وقال : كريم أنا سبب ، واش ربي كيبغني تال
هاد درجة ؟ .. بقيت كنشوف فيه ، وانا متعجب وفخاطري كنقول : اش هاد نفاق ؟
قلت : علاش دابا كترعد عليا ؟ ياك كنتي كدعي عليه وبغيتي ليه عذاب
هاهو ربي استاجب ليك! ،
قال : ولكن…
قاطعتو شديت ليه كتفو وقلت : مكاين ما ولكن حميد تفكر داكشي لدوز
علينا تفكر ذل وحكرة لدوز عليك سنين هادي ، كان ديما حاطنا تحت صباط ودابا ،
استاهل حيت مربحنا مع ديل مو غي غوات وصداع وتمارة ..
سرط ريقو وبقى ساكت شحال كيشوف فيا ، مسح دموع من عينيه و ناض دخل
تاني لمصلحة جمع حوايجو وخرج ، ومني داز من حداية
قال : كريم مكنتش كنصاحب قلبك قاصح هكا .. ومشى .
رجعت انا لخدمتي ومافكرت لا فمدير ولا فكلام حميد بقيت خدام تا دخلات
عليا الهام وبقات كتشوف فيا باستغراب وقالت : واش مدير كيموت ونتا راجع خدام ؟
قلت ليها : واش بغتني ندير ؟
قالت : مانعرف ولكن بعدما شفتي داك منظر مزال عندك خاطر باش تخدم ؟
قلت : دابا اش بغيتي مني ؟
قالت : والو غي جيت انقلك بلي مدير قبل مايخرج قبّل واحد سطاجيرة دوز
معاكم هنا شهرين ديال سطاج وغايتزاد بيرو هنا (وشيرات بصباعها لبلاصة مقابلة معايا) وقاليا مدير نعلمك
، عرفتي لاش قبلها ؟
قلت : علاش ؟
قال : باش تعاونكم تا وحميد فخدمة معطلة ، وبقى بارك تما ياميت لقلب
، سدات لباب وهي تردخوا عل جهد قفزاتني .. غوت وقلت الله انعل موك والدين ..
خنزرات فيا مور جاج ومشات ، مافهمتش مالها ؟ شنو درت ليها ؟ واش بغات مدير ابقى
فيا ؟ الله انعل مو والدين ، شيباني هو لعبر عليها ، دوماج مايمكنش لي نكتب
اسمها تاني ..
رجعت خدام الى ان دقات سبعة ونص ، خرجت درت قهيوة مع راسي وقبل
مانرجع لدار ، مشيت لدرب ، دزت من حدى جزار و حدى بقال و حدى نجار تم طلعت لدار
كليت شوية و دخلت بيتي ودخلت معايا كاس ديال
اتاي جبدت كتاب من شكارة لقيت اسماء والديهم وخانة خامسة تختموا ،حليت شرجم باش
نطل ، مدازش بزااف تاع وقت تاخرج محماد بقال كينتف شعرو وكيغوت : واعباد الله
كارني ديال كريدي شفروه ، حمد نجار تخشى فيدو مسمار ، اما بوشعيب جزار فكان هاز
شاقور بغى اقطع واحد فخد لكنه فلت ليه وتخشى فكتف واحد مرى .. وفلحظة تحول درب
لساحة معركة ..
شربت جغمة ديال اتاي ، ودخلت وسديت شرجم ، ماعرفتش لاش كتبت اسمائهم
؟ مافهمتش !! كأني كنبغي نتأكد ونزيد نتأكد ان كتاب خدام ! ، خصوصا طريقة لي قال
ليا براهيم لغي بقرب من ضحية لقى اسماء والديه مكتوبين وكنت فعلا ناوي نعرف طرق
اخرين ونخلص ثمن عليهم لكن براهيم مالقتيوش مكونكطي عيطت عليه لكن طافي تليفون ...
لغد ليه فخدمة تجمعوا مواظفين وبدات اخبار كدور ان مدير ماماتش وان
حالتو حاليا مستقرة ، وان اجتماع غاينعقد باش احددوا مدير جديد ..
مشيت لمكتب ديالي ومن ورى جاج بان لي بيرو تزاد فبلاصة مقابلة مع
لبيرو ديالي ، وكانت فيها بنت طالقة شعرها ولابسة قميجة مزوقة ، كنت كنشوفها فقط
من لور ، حليت باب وقلت سلام عليكم ، هزات بنت فيا راسها وقالت بصوت انثوي : عليكم
سلام ، وناضت مدات يديها وقالت : سي كريم معاك "لمياء كليم" سطاجيرة
جديدة ، سلمت عليها وبنظرة خاطفة شفت تفاصيل وجهها ، كانت رائعة جمال وجه بيض وشعر
مخلط بشهوبية منساجم مع عينيها عسليين ، حسيت بلحب او شي حاجة ، مهم سخونية جاتني
، قلت ليها بابتسامة : شكون قالك اسمي ؟
قالت : سكرتيرة الهام لقالتها لي نتمنى نكون خفيفة ومانثقلش عليكم ..
قلت : مرحبا خاصك شي حاجة هاني فلبيرو حداك ، حركات راسها بأه وقالت
: شكراً ، ريحت فبلاصتي وبقيت خدام ومنخبيش فرحة ان هاد جمال غادوز معانا شهرين ،
ومع مدة عرفت ان حميد مغاديش اجي ، دازت فترة قصيرة تا سمعت صوت لمياء كتقولي :
كريم واش بغيتي شوية ...؟ ، شفت فيها ولقيتها هازة "سوبيرة" فيها حلوة ،
مديت يدي خديت حبة وفخاطري كنقول : سميتك حرااام تكتب فهاد كتاب ...
يتبع ......
****
**** **** **** ****
