جزء الخامس : كريم

جزء الخامس : كريم 

فديك وقيتة كانت اصعب حاجة هي اكون عندك بيسي حتى سبير كان غالي خمسة دراهم لنص ساعة رغم ان واليد كيعطيها ليا لكن كتجيني صعيبة نخسرها كاملة فسبير عوض مانعمر بيها كرشي ..

قلت نتشارك انا وخالد ولا خوه حسن كل واحد احط فينا خمسين ريال لكن بجوجهم رفضوا بحجة ان بلاي حسن من سبير فلتجأت لكوثر لوافقات لكن بشرط تأخذ ربع ساعة لولة ولبقا ديالي ...
درنها لمدة ثلت ليام ودخلت لمنتديات بزاف ومالقيت تا معلومة عن كيفية استدعائهم ، سوى انهم كيعطيو دوك حلول تقليدية باش انتجنبهوم ( اغلق ابواب ونوافذ فليل ، ماتقربش لأبار فليل ، وماتخليش صندالة مقلوبة وهكذا .. ) فقدت اي امل نلقا شي معلومة تقدر تساعدني حيت فديك وقت مواقع لكدوي عل ماورئيات كانت منعدمة وكاع لا لقيتي كتلقى غي تحذيرات .. فخويت راسي من هاد موضوع نهائيا حتى ابان شي بديل ..

فهاد فترة وصلانا لسن لمراهقة مأثرات فيا كيما اثرات فكوثر لبدات تزيان وتصاحبات مع واحد سميتوا اشرف وفكل حصة مني كتبرك حداية كتبخ لي راسي بيه وتبقى تمدحو ليا على انه ظريف وزوين وحنين وانه كتبغيه مافهمتش ! بحالا بغاتني نغير منو ، وبدات تبان بوادر انها أ طلع بحال ختها ..
وبصراحة حتى مني كنسمع هاد هدرة كنحس بحكرة بحالا انا مافيا مايتشاف فوليت كنتجنبها غي باش مانسمعش حس داك لعنيبة تاني ...

بقيت متبع دراستي وفأوقات فراغي كنطلع انا وخالد وخوه للبيت لسطح نلعبوا ضامة او نبقاو غي مجمعين .. دوينا عل استاذة ومدرسة وشوية لبنات لكي قراو معانا وقلبناها لموضوع لجن وهاد نقاشات هوما لكيعجبوني 
عاودلي خالد قصة بنت لكدوش بليل وقال : ان واحد اسرة عندهم بنت كتدوش ديما مع نصاصات ليل وهي كتغني .. وفواحد ليلة ناضت الام توضى تصلي لفجر شعلات ضو ديال طواليط وهي تبان ليها مرى لابسة بيض وشعرها طويل وكحل وعندها لكرون وكانت مشغولة كتغسل فلقرقارة ديال طواليط سولتها الام شكون نتي ؟ جاوبتها لمرى وهي عاطيها بظهرها وقالت : قولي لبنتك ماتبقاش تغسل بلما سخون تم طفى ضو و غبرات

استغربت من قصة وقلت : الارض ربي واسعة علاش بضبط غادي اسكنوا فطواليط ؟ 
خالد : حيت هداك مكان وحيد لما كي تذكرش فيه اسم الله 
سكتني بهاد جواب لكن تحديتو وقلت ليه راني فايت درتها وماوقع والو 
خالد : كان عليك ديرها من طناش لفوق 
انا : نديرها قدامك كاع لابغيتي 
خالد : واخا .. نتخاطرو الا درتيها نعطيك خمسة دراهم
انا : مشات 


فديك ليلة مع طناش قررنا نباتو انا وخالد فسطح سخنت ما وخويتها فل قرقارة ديال سطح وبديت نغوت : وبانو لكنتو رجال .. وكان خالد كيطل من شرجم لبيت ..
دخلت لبيت شفت خالد كلو كيترعد وكيقرى قرآن حبست ضحكة وطفيت ضو وقلت ليه تصبح على خير ، غدا عندك خمسة دراهم .. غطى راسو بلمانطة ودار راسو ناعس فبغيت نزيد نخلعوا ..
هزيت صندالة وانا نضرب بيها لباب وغوت بحّر جهدي ماجيت فين نتلفت حتى بان ليا خالد هاز منطتو وهربان كان كيبان بحال سندباد .. وانا كنتركل عليه بضحك 
لغد ليه مابغاش اعطيني خمسة دراهم بحجة انهم بانو و بدى كيعاود لصحابو ان لجن دق علينا وكيسيفطهم ليا باش نأكد ليهم لخبر ههه ..

ماحسيت بوقت كيداز تاسالات دراسة ونجحات كوثر بزز اما انا وخالد سلكنا ريوسنا بواحد 12 ..
جات عطلة صيف ولات جميع اوقاتي فارغة وباش نكسر داك ملل وليت كنتلقى بكوثر بزاف ، حاولت نسل ليها لسانها على اش كادير مها لكن عند كل لقاء كيصوني ليها تليفون وكتقولي سمحلي هذا صاحبي اشرف وكتبقى عشية كاملة كتهدر معاه ..

طلعنا لثانوية وهنا فين غاتفركع كوثر كبرات وكبر معاها صدرها ومؤخراتها ومع مها طالقة ليها لعب كتلبس لبغات مما كيزيد ابين تضاريس جسمها خلاها هادشي تكسب بزاف صحاب و تكبر عليا حتى سلام مابقاش بيناتنا وولات تبان لي ديما مع مول سكوتر (اشرف) قدام ليسي وفهاد سنة زادت تطورات وقت وبان جوجل وفيسبوك و يوتيب و بديت كنلقى داكشي لبغيت ...

يتبع ...

تكملة قصة ==>> جزء السادس قصة كريم