جزء السادس :أمين "وحداني"

جزء السادس :أمين "وحداني"

دازت ديك ليلة عادية بنسبة ليها هي اما امين قلب عل اعذار حتى عيا وجاوبها كان واحد "عفاك راه عندي غي هاد عشية" ..
دارت معاه مع تلاتة فلحي "كروي" حي راقي وفيه ناس قلال وكانت كتمشي ليه كل سبت فلعشية حيت كاين تما كالم كيما قالت ، و بعيد على دربهم بشي عشرة كيلومتر معتارضش امين عل بعُد حتى هو بغا ما امكن ابعد من درب باش اضمن مايشوفوا حد .. سالا معاها هدرة مشا حط تليفون اتشارجا وتكى فبلاصتو وحاول اقنع راسو بلي كلشي غادوز مزيان واجبد على واليدها حتى لوحدة .. 

فاق فطور مابغاش ادوز تفكيرو عامر غي بديك خرجة اش غادي البس واش غادي اقول !! .. طاحت عليه واحد فكرة هز تليفون مشا دريكت لجوجل وكتب "مواعدة فتاة" بقا كيقلب على شي مقال ابسط ليه امور وي حيد هاد توتر لفيه .. لقا جميع مقالات بلهجة مصرية وفيهم غي مغازلات "بحبك يا أمورة ... بحبك موت .. انتي نور عيني" تيقرى وتيضحك هو مابغاش هادشي بغا مقال ايوريه كيف اهدر مع بنت كيف اتمشى معاها بحال هوكا متلا ..

دار باج خامسة ديال بحت فجوجل غايبان عنوان متير "كيفية صيد فتاة او مايسمى ببنت عيلة " دخل ليه لقا مقال طويل وبلعربية فصحى وفيه مراحل وكل مرحلة بعنوان .. يعني مرحلة لولة تعارف "تعرف على فتاة بشكل لبق مع حفاظ على ابتسامتك الى اخره.." مرحلة تانية مغازلة " وصف فتاة بأنها جميلة وجذابة وانك لا تستيطع نوم دون تفكير فيها الخ .."
بقا كيقرى مراحل حيت طوال حتى وصل لمرحلة خامس عشر واخير بعنوان "فراش فخ" " بعد تأكدك ان فتاة قد غرقت وذابت بحبك حاول ان تخصص لها ليلة رمنسية مع شموع وورود في غرفتك او احدى فنادق ليس مهما ان كان فندق فاخرا او لا وكن على يقين انك إن اتبعت مراحل بحذافرها ستأتي لك عن طيب خاطر اتصل بيها وقل لها انك تعدها بهدية ستظن ان هدية هي طلب زواجها عند وصولها ارمقها بنظراتك بريئة مع كلام معسول وحاول اقتراب منها تدريجيا ضع يدك في يدها ويد اخرى في وجهها اذا رأيت علامات استسلام او حرارتها ارتفعت مارس معها (هاد كاتب تعمق فتفاصيل بزااف) " وفي اخر مقال "وفقنا الله واياكم" كاتب حمادة مصري ...
شد امين فكرشو وطاح بضحك تخطيط كامل على قبل ديك ليلة و خونا كيشجع عل فساد ووفقنا الله هههه قمة تناقض (وهاد مقالات عطاهوم الله) ..
شاف فساعة ناري تلاتة لاروب هادي (تفو هاد زبل ضيع ليا وقتي) مشا لماريو لبس بيل بيض وتجين وسبرديلا مشاف كاع راسو كيداير بقوة زربة هز واحد عشرين درهم كانت عندو .. وخرج شد طاكسي ووصل مع تلاتة وربع حطو فمكان قريب من حي قلب عليها فشارع لول تاني مالقهاش عاد تفكر بلي كاينة واحد جردة خارجة شوية عل حي وتقدر تكون تما ... وفعلا لقاها تما دخل من باب جردة وفراسو مرحلة لولة ديال داك مقال تبسم ومشا لجهتها شافها باركة فكرسي وداير ايدها ليسرا على وجهها وليد لخرى هزا عصا (غصن شجرة) وكتخربق فتراب لحدا رجليها وكيف عادة لابسة لبسة مستورة .. 

وقف قدمها هزات عنيها غي شافت فيه تما امين حبس تبسيمة وماقدرش اشوف فوجها مدات ايديها تسلم عليه حس امين بلي ايدها خفاف وذابلين بجفيل .. برك حداها ... "على سلامة عاد جيتي" قالتها شيماء 
امين "درتي معايا فلحي كروي ماشي جردة كروي"
- راه صحابني مغاديش اجي داكشي لاش جيت لهنا
-ماعيلنا لباس عليك ؟

كان كيدوي وعينيه فلرض وهي باينة عليها تيقة فراسها كتهدر بطلاقة عكس امين لكيلوح كلمة ولا جوج .. لاحظ فيها بلي بعض مرات كتسكت وكتحل عينها مزيان كتبقى ساهية كتشوف فشي حاجة كيستغل امين هاد موقف وكيتأمل فيها وجهها بيض وفمها حمر و نفها صغير وزيد عليها دوك عنين عسليين ملامحها بريئة وبلاما مكياج وشاعلة بزين بحال شي درية صغيرة!! ... 
فاقت من سهو ودورات عينها جهت امين لقلب تاهو عينيه دغيا لجهة لاخرى 
بعد تقريبا ساعة بدا كيسخن حديت و لا امين كتجاوب معاها وزعم عليها شوية قلبوها نكت بدات كتعاود ليه نكت حامضين وهو كيضحك ليها ضحكة صفرة غي باش ارضيها يلاه بغات تعاود نكتة خرى .. 
شيماء : امين سمع سمع هاد نكتة .. قاليك هذا واح...
قاطعها امين : بلاش بلاش الا زدتي نكتة فمي غايتبلوكا بضحك يلاه نتمشاو حسن 
- هههه اوكي
غادين كيتمشاو وفبالو ايديها لبلاكة لطوبيس اشدو 11 امشو لجامع حسن تاني .. ماحشمش منها قاليها بقات غي مياتريال حيت جيت فطاكسي وماعدي باش نخلص عليك طوبيس ضحكات هي وقالت ليه بلي هزا 300 ريال 
طلعوا وحطهم فترمنيس تما عجبها بزااف شافت "توريست" وبحر وبنادم كيعوم وكتشوف جامع قدو قداش .. مشاو لساحة جامع ووقفو تما مقابلين مع بحر .. مني تلقاها وهي بلا بلا بلا لكن من وصلوا تم ضربات طم وكترات تاني من داك سهو ديالها .. دار عندها بغا اسولها واش عجبك هنايا لكن ....
امين : مالك كتبكي !؟
بدات كتمسح فدموعها شوف امين هادي اول خرجة ومافيا لنكد عليك بمشاكلي غي تفكرت شي حاجة وصافي مادرش فبالك !! 
امين : بخاطرك !! 
دازت لعشية دغيا ورجعوا مع ستة وهوما راجعين وهي كتشكر فيه وكتقوليه ضروري نعاودها سيمانة جاية ... 
اوا بقاو هوكا كل سبت اتلقاو حتى دورها لكاع اماكن لكيعرف فكازا داها لعين دياب و "موركو مول" .. شافوا ناس لعيشين ناس بورجوى وكيضحكوا على ريسوهم لقيساهم لحزقة مع ذلك ديما ناشطين 
.. وكل ليلة فيس بوك وولفو على بعضياتهم بزااف حتى امين تطلق معاها ولا اهدر معاها بحالا كيهدر معا صاحبو وعتارفت ليها بلي نكتها حامضين كتر من قياس وهي كتفكرو فاش كان حشمان وحاني راس .. امين صرف كاع دوك يامات وحدانية فيها ولا كيهدر بزااف فاش اكون معاها حتى هي الا دوات اش جاب مايسكتها ..

منين رتاحت ليه قررت انها تخوي عليه داكشي لفقلبها وغايعرف لجحيم لكانت ورى هاد ضحكة لجحيم لعاشتو ومزال كتعيشو اولها مني سولها علاش كتسهاي بزااف قالت ليه بلي مريضة بمرض "توحد" ..

يتبع ...