جزء التالث و تلاثون : حاروغ
شدات شكارة
ومشات وهي حانية راسها ، ابتسمت لكن سرعان ماتحولات لضحكة وانا كنشوف فنسيبتي
كتبعد ، فهاد هدرة كلها لي قلتها هدرة خاوية ، درت هكا باش نتجنب اسئلة سارة :
منين جاوك هاد فلوس ؟! ، واش حلال ولا حرام ؟!
شعلت كارو
نتكيف وبقيت مريح تما شي ساعة وانا فقط كنشوف فالارض وكنفكر ، ساهل تفكر لكن مني
تجي تنفذ كتلقى صعوبة ، نهار لفقت من سبات لكنت فيه وقلت نستمتع بحياتي ونوصل
لسارة باش ماكان ثمن ، كنت عارف انني غانطيح فهاد مواقف لكن مكنتش عارف ا لالم
لتقدر تخلي ، دابا وصلت لنقطة لاعودة فبعد مجزرة بارح ، ليوم غاتنوض مجزرة خرى و
غايضرب زلزال عنيف مصلحة ودار وكاع ناس لدايرين بيا .
رجعت لدار
بخطوات ثقال ، دخلت لبيتي ، تكيت على ظهري وانا كنشوف فسقف ، كان قرار صعيب حتى من
واحد فقد ضمير بحالي ،كنت فعلا كنتعصر نجبد شوية انسانية لفيا ، نجبذ ذرة كريم
لقديم لدرويش و لغادي دائما جنب حيط لكني مقدرتش ...
بقيت على
هاد حال الى ان دقات 12:30 لبست حوايج عمل ، جبدت حاروغ من مجر وخشيتوا وسط ضواسة
فشكارة , شفت وجهي فمراية وكانت ملامح حزن باينة عليا لكن داخل مكنحس بوالو ...
خرجت وبقيت
كنتمشى بشوية عليا حيث ديك لحظة قاسية لغاتجي كنت بغيت نزيد نأجلها ، طلعت لطوبيس
ريحت فكرسي درت راسي على جاج وطريق كاملة وانا ساهي ..
وصلت
للمصلحة مع وحدة ، مشيت لبيرو لعند الهام ولقيت تحية ،هزات راسها وبنظرة وحدة
كتشوف ففارس احلامها قالت : كريم جابك الله عندي ليك واحد خبار والله اتا تفرحك ..
ابتسمت
وقلت : لهي ؟!
قالت :
مدير وافق اسني ليك ترقية ...
ضحكت
وفخاطري كنقول : اخشيها ف**** دابا ، قلت : لخير الى جا كيجي فخطرة وحدة ...
قالت : حق
الله تابغية نقز من فرحة ..
قلت :
مقالش ليك علاش بالضبط اسنيها دابا ؟!
قالت : حيث
عارفك اتزوج بيا ..
قلت : هي
دارها غي على قبلك ؟ ..
حركات
راسها بالا وقالت : لا قالي كريم ولد ناس واستاهل .. ضحكت وكملت : قالي كادو
ديالنا هو غايشري لينا ثلاجة وتلفازة ..،
قلت :
قوليه ازيد تا ماكينة صابون ..
ضربات يدي
وهي كضحك وقالت : ويلي كون تحشم ، صراحة كريم من قالها لي جاتني لبكية صدمني فاش
سمعتها من عندو .. اجي بعدا كيبقيتي ؟!
قلت : حمد
لله حسن من بارح ...
شافت ليمين
وليسر بحالا تاواحد مابغى اشوفها ، قالت : كريم واخا تسد عينيك ؟!
قلت : علاش
!
قالت :
سدهم خلاص ...
سديتهم
ناضت من بيرو وسمعت خطواتها كيقربوا لعندي ، شوية شداتلي يدي ليسرية وركبات لي
خاتم ، ضحكت بدون مانشعر ، قالت : حلهم ..
حليت عيني
وشفت خاتم "نقرة" فصباعي ، ابتسمت وقالت : ركب لي هذا ، حيدات خاتم من
بواطة وعطاتوا لي ..
شديت خاتم
وانا كنشوف فيها وقبل مانركبوا قلت : علاش درتي حاجة لخاصني نديرها أنا ..
قالت : كنت
عوالة نمشيوا انا وياك لبارح ونشروه مع كنتي مريض فخديتو أنا ..
ركبت خاتم
وقالت وهي كضحك : عنداك تصاحب انا لغانشري خاتم زواج ...
ضحكت
فوجهها وانا كنشوف سعادة بدمها ولحمها واقفة قدامي ، وكانت اول مرة نتسائل ، علاش
لمنتزوجهاش ونكمل معاها هادشي لبقى فحياتي ؟! علااش لمنساش سارة ونحب الهام من
قلبي ، علاش ..وعلاش .. وعلاش ....
شديت فراسي
وحاس بيه غاينفجر ، شداتني الهام وقالت : واش مزال عيان ؟!
قلت : لا
غي دوا لخديت مجهد شوية ، مهم نخليك تال ستة ..
خليتها
ودخلت لبيرو ديالي ، سلمت على حميد لي رد سلام بضحكة وقال : عليكم سلام العريس ،
تا لاش مجيتيش فصباح ؟! ..
قلت : مريض
شوية !
ضحك وقال :
ابلاتي تزوج وتشوف مرض ديال بصح ، كريم بلاما نوصيك خاصك اي حاجة كيفما بغات تكون
هاني معاك ..
ابتسمت
وقلت : لهلا يخطيك ....
بديت خدمة
وانا بهاد معنى غي كنخربق ، كنورك على بوطنات كلافي وانا مرفوع ، تحسن كلشي من
وليت مع الهام ، علاقة مع موظفين ومدير ، ترقية لعلى وجهها غنخدها ، عزلت مروان
بوحدو بحال مسطي، فين غادي بهادشي ؟! كلشي غايريب فلحظة الى قتلتها ، باش حسن سارة
من الهام ؟! وعلاش اصلا هاد فتنة نايضة فداخلي ؟! .
بقيت على
هاد حال تجات عندي الهام غمزاتني وقالت تكلم للمدير تم دارت حركة سيناتور بيديها
فهمت انها ترقية .
مع غانوقف
غانجمد فبلاصتي شفت فشكارة .. هاد مرة الى قلبوها غيلقاو حاروغ ، هزيت كتافي بعدم
اكثرات وقلت : نعطيهم اخر فرصة الى لقاوه فغكنذب على راسي ونقول انني حاولت نوصل
لسارة وماقدرتش والى ملقاوهش فضحية جاية هي الهام ...
مشيت عند
مدير استقبلني بديك صلعية لامعة ودخلة ديال مرحبا سي كريم ، لكن لخلاني نتفاجئ انه
عنقني وقالي : والله الا فرحت ليك ،كانت اول مرة نحس بيه كأب ماشي كمدير لديما
غوات وصداع ..
بركت فكرسي
قدامو وقالي : بلا شك عارف لاش جيتي ؟!
ابتسمت
ابتسامة باردة وقلت : شكراً بزااف .!
جبد شي
وراق وقالي : غتزاد مسؤولية واتزاد تا سالير ..
قلت : واخا
تسمحلي نسولك ؟!
قال :
مرحبا !
قلت : علاش
فهاد وقيتة بالضبط ؟!وقبل هادي عامين مابغيتش تسينها لي ؟!
قال
باستغراب : على كانت شي حاجة من هادي عامين ؟! ..
قلت :
ترقية لجات وقلتي لي ماشي وقتو و الادارة مرونة مع انتخابات وتقليص موراد وتقشف
...
ضحك وقال :
والله ماعقلت !
شفت وغضب
شاعل فيا حيث بان ان الامر عادي عندو كون كانت زيادة هادي عامين كون دابا زعمت
وخديت سارة وموت باه ولا اكعد ماشي شغلنا ..
قالي سني
شي وراق سنيتهم تم قال : غاندفعهم الادارة ونحاول نسرع الاجرءات وابتداء من شهر
جاي غتزاد ليك 2000 درهم ومهام خرى ..
ابتسمت
فوجهو وخرجت للمكتب ديالي شفت فحميد لمع دخلة قالي مبروك ..
عرفتو انه
مقلبش شكارة ، بركت فلبيرو وقنعت نفسي انني عطيتهم فرصة كون حصلت مغيرحمونيش وحتى
انا مغنرحهمش ..
بقيت خدام
تاوصلات وقت خروج ، لبست فيستا وخرجت ، لقيت الهام هي وصحبتها واقفين عند باب ،
وهاد صحبتها هي لعاودات لي ان الهام اغتصبها شيباني ..
سلمت عليها
وقلت لالهام مشينا ؟! ، وقبل ماتودعها شافت فيا بنت وقالت : كريم انقولك كلمة حق
قدام الهام ..
قلت :
مرحبا ..
قالت :
اقسم بالله كون غي كانو كاع رجال بحالك !تم مشات بدون مانفهم والو ، شفت فإلهام
طلبا في استفتار قالت لي فطريقنا غانشرح ليك ..
شدات لي
فيدي وبدينا كنتمشاو وقالت : كنتي عارف انه وقع ليا مشكل ودرتي راسك مفخبارك والو
، منين حكيت ليها انني عاودت ليك على مشكلتي وتقبلتي الامر قالت لي : انه كان عارف
وخبى عليك ، تصدمت سولتها كيفاش كان عارف ؟!
قالت : قبل
منعاود ليه قالي انه حاط عينو عليك وكيبغيك وعطاني عاهد ميقولها لتواحد ومني عرف
شنو وقع ليك دار يدو فمو وتصدم وشوية كان غايبكي ..
تباً امتى
غايسالي الجحيم ..
شافت فيا
بعينين متلئلئين بدموع وقالت : مكنتش عارف انه شي واحد فهاد دنيا كيخاف عليا ،
كريم شتي انا نموت على قبلك ...
شفت فيها
بحزن ، وقلت : بلاما تبكي ..
رجعت نظري
للطريق وهي معارفاش انني غادي بها للمثواها الاخير...
يتبع .............
تكملة قصة : جزء الرابع و تلاثون حاروغ
********************************
