جزء الاول : مخطوطة
للكاتب :Mohamed Amine
فليلة 13/12/2010 باقي عاقل على تاريخها بالضبط ، كنت شاعل بيسي كندور فشوارع فيسبوك كنت فقمة ملل وقلت مع راسي بما ان عندي شي اصدقاء غي اصنام خاصني نغربلهم بديت كنسيفط فسلام لمكيجوبش بلوك خصوصا لدوك لبنات لكيتصورو غي من صمطة لتحت زعما شوفو مؤخرتي شحال كبيرة او هادوك لكيتصوروا فطواليط كانت لمكتوجوبنيش كنقولها ختي سيِّقي معاك راه ريحة خانزة وكنبلوكي وبعض مرات كنوصل حتى سب ...
شوية وانا غارق فبروفيلات ولبلوك كيوصلني ميساج شفت سمية لقيتو داير (شيخ منصور بن عثمان) طليت على ميساج وتصدمت كان مكتوب " الذي تفعله يا ولدي لا يجوز" قلت امكن فيس ديالي داوه لي بدلت مود باس فبلاصة وعاودت حليت قلت ليه باش عرفتيها كان هو يدوي بالفصحى وقالي " لا يعلم غيب الا الله انا كنت فقط مار قرب بيتكم انا لا اقصد سبك للفاجرات بل النافذة مفتوحة قرب فيس بوك " تحشو ليا ركابي فديك لحظة حيث نافذة لكنت حال كان واحد مقطع فيديو اباحي "استغفر الله" سديتها فبلاصة وقلت لي كيفاش ختارقتي حاسوبي ؟ قالي " قلت لك مسبقا انا فقط مررت قرب بيتك إن كنت تريد وانا طبعا احب لك خير سأرسل لك احد ليوجهك لأني اراك فعز شبابك لكن تفكيرك ضائع " سولتو شكون نتا ؟ لكن طلعات لي echec يعني ولد حرام بلوكاني طيح فيا شك فهاد ليل بقيت غي كنفكر شنو ندير ؟ دوشت وفورماطيت بيسي ديك ليلة وعمرتو بقرآن وغد ليه فقت مع فجر صليت فجامع لأول مرة فحياتي حيث هاد خينا شككني انني غنموت دزت على فران شريت محراش رجعت لدار لقيت واليدة فايقة ومبتاسمة ليا بحالا فرحانة بيا عمرات اتاي وانا مشيت صليت جوج ركعات قسيت شوية وبست على راس واليدة وقلت ليها مسامحة من وجهها عرفتها انها جاتها غريبة
قاديت حالتي وخرجت مع ستة صباح باش نمشي لافاك ومع وقيتة لبرد كان حال مظلم وقفت فبلاكة طوبيس كانت دنيا خاوية حيث جيت شوية خارج على مدينة كازا بقيت شي ربع ساعة حتى مليت ريحت فعتبة طريطوار وكنت مكمش من لبرد شوية كنحس بيد على كتفي دورت راسي كنلقى بنت محجبة من نظرة لولة فوجهها كانت زوينة وسؤال وحيد لطاح فبالي منين خرجات هادي وسط هاد لخلى ....؟
