جزء الاول : أمين "وحداني"
سميتوا أمين فعمرو 18 سنة كيقرا فباك بعد ما جاب 4 فجهوي وفقد الامل انه اجيب شي باك وكان معول ادير سونتر غي نيفو باك ..
امين و"عشرنوا" ديال درب من صغر وهوما صحاب كان مكايتفارقوش ديما بلاي ولا فراس درب مقصرين ماتش خصوصاً ان باك مجايش مجايش ادوز عام كولوا ضحك حسن ماتبذل مجهود وتمحن على والو ... لكن غايجي واحد ليلة غايعرف كل واحد اش كايسوى ..
واحد نهار تافقو العبوا ماتش فليلة سبت دارو مع دراري دبروا على بالون ومشاو لتيران لهو عبارة عن شانطي وشاعلة فيه بولة وحدة وجهة لخرى شبه مظلمة مهم وهوما مقصرين جات نوبة امين فلحبيس كان عاطي بظهر لجهة مظلمة وكان مريحين جوج براهش تما .. تفزع بالون مشا امين اجيبوا لكن شاف واحد من دوك براهش خطف بالون وهرب كان قريب لأمين ودغيا شدو لكن ماجا فين شدو حتى حس بشي حاجة قاسحة ضربات عنقو و طاح وبقاو كيضربوا فيه مابقاش فيه حال ضرب ديال دوك خمسة دراري لمعرفهم منين خرجوا لكن لبقا فيه هو انه طايح لرض وكيشوف صحابو كيتفرجوا فيه .. هربوا دوك دراري وخلاو امين منشور تما وسط شانطي وكولوا دمايات ... منين سلاو من امين عاد جاو هادوك "صحابوا" وكان فاقد وعي مشا واحد عيط على مو لجات بزربة وبدات كتغوت على دراري علاش خلاوهم اضربوه لكن تاحد مادوى هزاات تليفون وعيطات عل اب لمن حسن حظ كان مريح غي فقهوة هز طونمبيل لعمل وخطف امين لسبيطار هاد حادتة لغتبدل بزااف دلحوايج .. شٓخص طبيب حالة امين وقال لاب بلي حفظوا الله انه تضرب فعمود فقري وماتشللش وعندو تهريسة فليد ليمنا دارو لكبس ديك لعيبة لكتون فعنق .. وعطاه شي دوايات وشهادة طبية دربع شهور خاصو ابقا اطول مدة ممكنة غي متكي ومايجهدش بزااف عمود فقري فهاد مدة .. رجع لدار وهو كيتألم فخاطرو كتر من الم ديال ليد وعنق ..
غد ليه جاو دراري بغاو اشوفوه جات ام عند امين وقالت ليه بلي صحابك فباب وبغاو اشوفوك وهو اغوت امين باش اسٓمعهم "مابغيتش نشوف تا شي كلب" وبدا كيسب وكيسمعهم هدرة خايبة خرجات ام امين عند دراري وقالت لهم بلي طالع ليه دم هاد نهار غي ابرد شوية ودوزوا عندو .. بقا امين فديك حالة شهرين ودوك صحابوا كيما كان كيظن فهموا ريوسهم ومبقاوش كيجيوا عندو تا ففيسبوك مسحهم كاملين ...
تحسنات حالتو شوية ولا كيخروج لسطح مع علم انهم ساكنين فطابق رابع وسطح حداهم ومن كترت ملل زرع عدس ولوبيا كيمشي اطل عليهم مرة مرة .. مع مدة ايتعرف على صاحب جديد لهو سقف دسطح كان كيريح على حافة سقف على يسارو كان كيطل على جردة وشانطي لحد جامع عجبوا لحال خصوصا كان كيدير ليزيات وكيتمزك وكيتأمل فديك جردة .. فديك شهرين لبقات وكان كل نهار كيطلع لسقف ويفرش مانطا وكيتكى وكيبقى كل نهار مريح تم كتر من تلاتة سوايع
..
برا ورجع مدرسة وبقات شهر الامتحانات بكلوريا مني دخل مدرسة مهدر مع تا شي واحد حيت اصلا تاحد ماهدر معاه حيت اغلبهم دراري ددرب كيريح فطاولة لخرا بوحدو بعض مرات كيرسم وبعض مرات كيلعب ضامة مع راسو وكيتسنى غي امتا تسوني باش ارجع لسقف كيف حمامة ..
صراحة سيمانة لولة من بعد مارجع لمدرسة حس بنقص كان كيشوف دراري مجموعين ولا مريحين فعتبة لحدى دارهم وهو بوحدو بدات كتجيه نوبات اكتئاب ولا انطوائي حتى مو بدات كتشك فينهوا داك امين ضحوكي ولا كياكل بوحدو بل حتى اساتذة تفاجئو منو كان ديما منوض صداع وديما جاريين عليه اما دابا ولا غامض كتر من قياس حتى لهدرى نادرا تسمعوا لكن مني كيطلع لسقف كيحس براحة وماعرت اش كيعجبوا فديك بلاصة !!!
دارت ليام وبقات سيمانة لامتحانات واحد نهار وكيف عادة خارجين مع عشرة باش استارحوا فساحة خرج امين ومشا حدا حراسة حيت تما كيكون خاوي وكان واقف يلاه بغا اجبد تليفون اتصنت لديسك لكناوي "مالني وحداني" حتى بانت ليه ... صراحة اغلب شباب كيتفتنوا من وحدة لابسة مزير وطالقة شعر مشية لكتبرز تضاريس جسمها ... لكن هادي لشاف لاشئ مما سبق ديرة زيف على شعرها وطالبية هابطة لركبة ولابسة صاية وتقربيا قدو فطول وجهها صغير وعيناها عسليين مع نظارة وباينة عليها عفة .. ماتفتنش بها شاف اشكال وانواع ديال بنات لكن شي حاجة عجباتو فهاد درية .. دازت من قدامو وكانت داخلة لحراسة وبقا تما عاصر غي تخرج باش اعاود اشوف فيها لكن صونة جرس ودخل ديك ساعتين عند علوم وهو غي كيفكر فيها .. صونات 12 مشا دريكت لدار كلا شوية وطلع تاني اتشمش فداك سقف وكان عندو نص نهار .. بقا تما حت لوحدة كيتمزك خرجات مو سطح تعيط ليه اتغذا هز ايدو لفوق ولوح ليها يعني مابغاهش ... وصلات تلاتة لعشية دار لجهة ليمنيا باش اشوف ديور حيت عيا من ديك جردة بقا كيركز فواحد سطح بعيد عليه بستة ديورة بانت واحد سيدة كتنشر ودايرة نيفية فوق راسها بقا كيشوف وهي عاطياه بظهر .. دارت بغات تهز نشير لكن تفاجئ فاش عرفها هي صاحبة نظارة لشاف فمدرسة بنت لحرام شهبة من فوق لكن كيفاش تا ساكنة فدرب وهو عمرو شافها ؟! ....
يتبع ....
