جزء التاني : أمين "وحداني"
كيفاش ساكنة غي فدرب وهو عمرو شافها ؟! ...
بقا كيشوف فيها وكيتأمل فشكلها وديك نيفية مع داك شعر شهب جات معاها سهى امين و نظرات اعجاب باينة على وجهو ولو هي فسطح دارهم ومع ذلك ساترة راسها .. سلات نشير وهزات سلة وهبطات مع واحد باب
دارها بعيدة شوية على دار امين لخاصو حتى اوقف عاد تبان ليه بالوضوح !!..
رجع تاني تكى فبلاصتو وخشا ليزيات فوذنيه وطاح فواحد دويسك لكي سرح بمخيلتو وحاول حيدها من بالو وبراكة من حب فوق سطوح حيت هو اصلا مكيأمنش بالحب .. لكن فيما كان كيسد عينيه كتخيل راسو واقف معاها وهي كتبسم ليه حل عينيه وحلف متخيلها تاني وبغا اتخيل راسو لاعب كرة سد عينيه تاني وتخيل راسو فتيران وجمهور وكاميرات جات عندو كرة غيراوغ لول تاني تالت غيماركي بيت وغايجري فرحان لجيهت جمهور اعنقهم وهو كيجري غايسمع صوت انتوي كيعيط باسمو "امين امين" دار لجيهت صوت غايلقا ديك لحرامية تاني غايبقا اسب فيها خرجي ليا من راسي الله انعل ..
امين ولا عندو بحال فصام فشخصية كيحس بشي حاجة كضارب داخل راسو .. راس تايقول ليه دور راه بنت غتهز نشير وراس اخر كيقول بحالا اتقبل عليك .. من نهار شاف هاد بنت وراسو دارو وولا كيدوي مع راسو بزااف ..
طلع ليه دم هبط من سقف ودخل لدارو بدل حوايجو ومشا اجري لأول مرة منذ وقعات ديك لحادثة ... مشا لتيران لبعيد على دربهم وكيقول مع راسو بعد هنا ماتقدرش تبعني فيه ... مارجع حتى طاح ظلام ورجع مهلوك دخل لدار دوش و قسى شوية وطاح دودة ... ولا كل نهار كيديرها فيما كطيح فبالو كيمشي اجري فتيران اللهم تعب جسدي ولا ذهني واخا عارف راسو عمرها ماتكون ليه حيت اصلا عمرو مادوى مع شي بنت كتر من خمسة دقايق ومعاندوش مع دوك علاقات
... امين بهاد لونتريما كان كيضرب عصفورين بحجر واحد لولة هي كيحد داك خمول لفيه و كينساها فديك عشية وهو كيجري وتانية كيرجع مهلوك مما كيسهل عليه انعس ومبغاش ادير فيها سهاري عشاق ...
دارت ليام لبقات قبل الامتحانات على هاد منوال حتى ام ديالو فرحات مني كتشوفو بحوايج سبور كيصحاب ليها بلي ولدها رجع العب مع صحابوا واخا مسكينة عارفاه ساقط فباك .. واب لتكلف باوراق لدفع لسونتر حيت ديك مدة كان امين مزال مريض ..
مني بقات يومين على امتحانات مشى امين لمدرسة اجيب دعوة باش اعرف انا مؤسسة غادي اكون فيها امتحان ومواد لعندو ورقم طاولة .. دخل حراسة عطاهم سمية وعطاوه دعوة وخرج امين وهو كيشوف فيها مني هز عينيه ايبان واحد ولد قسمهم جاي عندو وباينة غايسولو انا قسم طحتي فيه ... امين مابغاش اهدر معاه قلب دورة ومشا جهت ساحة لكتخرج دريكت لباب ... خرج من مدرسة قاصد دراهم دور عينيه تيقلب على ديك خيتنا لكن مبانتش ..
جات تلت ليام ديال امتحانات شي شاد فراسو وشي طايح عل ورقة وشي كينقل وامين غي كيرسم فديك ورقة ديال تحرير بل وحتى فراغ لكي حس بيه فقسم خلى دماغو تاني اخدم تجاه ديك بنت ... سالو امتحانات وامين جاب زيرو فكاع مواد وسقط ومبقاش فيه حال وهاهي عطلة صيف قبل ماطرا حادتة كان امين كيخدم فقسارية كيشري سماطي وتقاشر فسوق جملة وكيفرش لكن هاد عام ماعندو كانة لخدمة خصوصا انه بغا اويلي بعيد على بنادم ..
داك سقف ولا فيه صهد طلع معاه جوج حبولا ديال نشير وربطهم فحديدة ديال باربور وربط طرف تاني فعود كان خارج ورى بلاصة فين كيريح ولاح ازار فوقو باش اضرك من ديك شمس ومبقاش كيدور لجهة جردة الا قليلا وخا كيحاول اكذب على راسو بأنه مكيدروش على قبلها .. واحد نهار اتبان ليه واحد سيدة فسطح ديال ديك خيتنا وهزا سطل وغايفرح مني غايشوف ديك بنت دخلات سطح وهزا كراطة خوات ديك سيدة سطل ما فسطح وديك بنت كانت كتكرط كانو كيسيقوا سطح ... هبطات سيدة وباينة مشات تعمر داك سطل بلما حيت ماعندهومش روبيني فسطح وخلات ديك بنت كتكرط ما .. امين قال هادي هي فرصة وقف وهز ايديه وحاول الفت انتباهها ووالو درية كاعما تلفتات جيهتو هز حجرة صغير حاول الحوها فسطحها باش غي تشوف فيه لكن حجر صغير ودار بعيدة شوية مغاتوصلش .. حاول بحجرة كبر من لولة وتقيلة شيّٓر بيها هو غي بغا الفت انتباهها لكن لحمار فلقها ...
يتبع ....
