جزء التاني : كريم
توضطات علاقتي مع كوثر وعمت معها فبحر خرافات لعيشا فيه وتعلمت منها
بزاف حوايج منها مني قالت بلي الا بغيتي تبغيك شي وحدة خاصك تمضغ مسكة ثلت ليام
ومني تاكل ولا تنعس حطها فلفريكو غي تسالي عاود حطها فمك ونهار ثالت لصقها فل بنت
لكتعجبك وغاتولي بحال خاتم فصبعك ..
عجباتني هاد لعيبة حيت كنت حاط عيني على واحد شهبة عندنا فقسم وقررت
نجربها شريت ربعة مساكي باش تبقى بنة اطول مدة ممكنة نهار لول سهيت وحصلاتني
استاذة كنمضغها ولحتها ليا .. مرة تانيا وليت فيما ندخل لقسم نخبي مسكة تحت لساني
.. دازت تلث ليام تقيلة حسيت بعضلات فمي ولاو صحاح ووليت نفكر كيفاش نلصقها فمسمات
(سلمى) تسنيت تال وقت لكنخرجوا فيها لساحة شفتها مجموعة مع صحابتها جبت مسكة من
فمي وسرحتها مزيان وقطعت منها شي طروفة حيت كتبان مهورة وطلبت خالد ادير راسوا
تابعني ... جريت جيهتها وغي قربت لعندها درت راسي طحت عليها ولصقت مسكة فكول
ديالها .. طلبت منها سماحة وتسنيت اش غادي اوقع ..
لغريب فأمر هو انه دازت يومين وانا غي كنشوف فيها ومني كلتقى عيني
فعينها كنقول صافي وليت كنعجبها وكنتسنها غي امتى تجي تهدر معايا هاد نهار لعمرو
ماجى ...ودرت اكبر غلطة من قلتها لكوثر
قلت ليها: بزاااف ووو هادشي طول !
قالت : شنو لطول ؟
قلت : درت مسكة و داكشي لقلتي ولصقتها فسلمى دازت سيمانة عمرها
عبراتني !
مجاوبتنيش ناضت من بلاتصتها ومشات جهت سلمى قلبات ليها طالبية مزيان
حتى وصلات لتحت لكول وهي تجبد لمسكة وطلقات واحد غوتة وهي كضحك (وناااري كريم
كيبغي سلمى) تزنكت ومعرفت ماندير فضحاتني بنت لكلب فديك لحظة كلشي ولا كيرجمني
بلكغواط مكمشين وشي بستلوات وشي كيركر بضحك تحرجت، هزيت شكارتي وخرجت قلت لأستاذة
لكانت واقفة فساحة راني مريض شافت فوجهي لقاتو حمر كثر من لازم وخلاتني نخرج ..
منكت يومين وانا كنتوبحط على واليدة على انني فيا سخانة مني رجعت لقسم سماو عليا
(مسيكة) ومابقيتش حامل نهدر مع كوثر حتى بدات طلب مني سماحة ...
دازت تقريبا شهر على حادثة "مسيكة" وفواحد حصة لقيتها
جابدا ورقة مكمشة وباركة تسرح فيها كان وسطها شي زغيبات مني سولتها ديالاش هاد زغب
؟ قالت لي ديال لحمار
انا : ومني جبتيهم ؟
كوثر : من لحمار ديال مول جافيل
أنا : واش غاديرو بيهم ؟
كوثر : غانخويو شوية حدا سبورة وشوية فكرسي فين كتبرك وداكشي لبقى
غانصلقو تحت بيرو
أنا : وعلاش هادشي ؟
كوثر : باش ماتجيش استاذة غدا
فكرت فلول نفضحها كيما فضحاتني لكن تراجعت حيث فضول واش هادشي غايصدق
او لا كان هو لمخلني ساكت ... دارت كيما قالت ولغد ليه فلعشية دخلنا لقسم وتسنينا
شي نص ساعة ومجاتش استاذة وكنا كنتسناو غي امتى ابان مدير اقول لينا خرجوا .. حتى
سمعت دري لي ورانا قال وهو كيطل فشرجم (بلاما تفرحوا هاهية جات) شفت فكوثر لقيتها
كتضرب فيديها وكتقول : تفو كون زدت شي زغيبات ...
هادي بعض امثلة لبزااف حاجات لكانت تادير بعضهم كيصدقوا بصدفة او كاع الا ماصدقاتش كتقول بلي غلطات او نسات شي حاجة
سالات دورة لولة وتعرفت على نوع اخر ديال سحر
عندو تأثير أكبر على داكشي لكدير كوثر ..
