جزء التاسع و عشرون : حاروغ
شفت فإلهام بنظرة عاشق ولهان ، كنت دوما كنتجنب نهدر على مروان باش نبان انني مامسوقش ليه و ماتشكش فيا نهائيا ، لكن هاد اسبوع خسرت عليها فلوس صحاح على قبل هاد لحظة و قنعتها انني راجل لتعول عليه وزمانها لغاتكمل معاه حياتها ، درت يدي فيديها وقلت :كيفاش كنتو غالطين فيا ؟! ...
هزات راسها
فيا و زيرات على يدي وقالت : كريم تأنا ليوم قررت نعاود ليك كلشي ...
شفت فيها
بنظرة بريئة تطلعاً لداكشي لغاتقولوا ، لكن داخلي كابح ضحكة شيطانية ...
خدات نفس
عميق وبقات ساكتة ، شوية كنحس بيديها لشدها بحالا كترعد ، قلت ليها : الهام مالك ؟
هزات راسها
فيا ودموع فعينها و وجهها زناك ، مسحت دموعها بيدي وعادوت قلت : قولي لي مالك ؟!
قالت :
كريم عطيني عاهد ماتخلى عليا ؟!
قلت :
وعلاش انتخلى عليك ؟
قالت بصوت
مرتفع : قولهااا !!
شبكت يدي
بيديها وقلت : هذا عاهد بيني وبينك بلي عمري مانتخلى عليك تاتفرقنا موت ..
بقات كتشوف
فيا وعيونها "كيتلئلؤو" بكثرة دموع ، عودات طلعات نفس وهبطتها شوية و
بكل ماتحمل كلمة من معنى انهارت عليا بلبكى ،تفاجئت هادي مالها ؟! حطيت يدي فراسها
و قربتها لصدري وكنقولها :تهدني ماوقع والو ... بدات كتفوه بشي كلام مع داك لبكى
متفهمش ليا ،خليتها مدة مكانتش بقصيرة تاتكلمات وفخاطري كنقول : شنو هاد كلام
لغاتقولوا و غايستدعي هاد بكى كامل ؟ ..
شافت
فالارض وقالت : كنت دائما كنقلب فين نعلق نشير ديالي ، فعز الازمة وانا طايحة
الارض مخنوقة ومعذبة من داخل لتقال ليا فديك لحظة نتيقوا لي قالي عين وسحر هو سبب
نقوليه اه لكن مني فكرت مع راسي قلت شكون لي غاعييني وشكون لي غايسحر لي ؟! كانت
حاجةعامة (شمولية) كنحاول نهدن بيها راسي ، ولكن مني تحدد لي فواحد كنت بغيت نخوي
فيه كاع عصاب لفيا وعلقت عليه كاع مصائب لدزت منها وكان داك واحد هو نتا ...
ابتسمت
وانا كنشوف وكنتسنى تكمل ..
خدات نفس
عميق و كملت بعيون كيغررو وقالت : نهار بديت كنحس بلغضب وعصاب وكان لتقالت عليك
نقول اه هو نهار جنازة لمياء ،مني خرجتي تا جمع مروان كاع موظفين لحضرو فجنازة
فطبلة وحدةبما فيهم مدير وانا وحميد ، سيد كان منهار فديك ليلة قطع كاع قلوب
لكانوا حاضرين معاه بلبكى ، سمعنا اخر تسجيل من مكالمتو معاها قالت شي كتاب لقاتوا
فشكارتك وفيه سميت موظفين و حتى سميتي ومن جات تصور لقاتك واقف عليها بدى كيشرح
وافصل و تاحد ماتقبل الامر حيث داكشي لي قال مكيدخلش للعقل ، زاد تعمق وبدى اسول
موظفين لوقعات ليهم شي حوايج ماشي تالهيه قلت انا تلوات رجلي وشي طاح فقادوس وشي
طاح عليه مصعد صباغة فديك لحظة كلشي شاف مدير كيتسناه اهدر شوية قال : وانا جا فيا
بنو .. ابتسم مروان بحالي الا لقى راس خيط و شعر انه مكيهدرش عن فراغ ، حتى بنادم
بدى اتيقوا وكنت كنسمعهم كيوشوشوا فيما بينهم وكيسبوك بسحار وبولد كذا ... ، قال
مدير : ماحد مكاين تا دليل ماعندنا كيفاش نشدوه !
رد مروان :
غانعطيه اسمي حقيقية والى مت او طرات لي شي حاجة ديك ساعة عندنا باش تشدوه ، لغد
ليه عليها عطاك اسمو حقيقية وماوقع والو شوية قلبها مشى لداركم لكن ماماك مخلاتوش
ادخل شوية دار دعوة لعرس ديال ديك سارة وماوقع والو ، بعدها طلب مدير ابقى اعيط
ليك وفوقت لتمشي عندو نقلبوا شكارتك ومالقينا والو ، بنادم بدى افقد الامل وكانت
اول مرة نسمع مدير كيقولي بيني وبينو ان هادشي تخربيق وعيا من هاد لعب ديال دراري
... لكن مروان باقي متشبت قدرنا ظروفوا بلحق هادشي فات قياس وفوقت لكيجمعنا فدارو
اقولنا اشغانديرو واخرها فاش قال انه هدر مع شي حد كان كيهدر معاك وعطاه ستة مليون
، من تما سيد بدى كيبان وسطنا بحال حمق قاليه مدير بعد جدال مطول وصل لدرجة غوات :
انه عيا من هاد حماق والى متقبلتيش موت لمياء فحنا عيينا مانهزوا هبالك ... وخرج
وتبعوه كاع لكانوا حاضرين ، خليناه بوحدوا مصدوم وكيشوف بديك نظرة لعمرها ماتنسى
لي ، نظرة باردة ديال واحد فقد كلشي فهاد دنيا .
وصلاتو
خبار انني تخطبت وحاول اجمعنا تاني لكن كلشي غسل عليه يديه فديك لحظة وتاحد ماجى
ليه ، طلبت منو اتلقاك وتهدروا نتا وياه لكنه رفض رفضا تاماً .
مني فكرت
لقيت دوك تفسيرات و دوك تحليلات كلهم كانوا من خيالوا، لكن تاحنا عوض مانقبلوا
بلمكتاب قلبنا فين نعلقوا مصايبنا ، كذبت على مروان ومابغيتش نكذب على لي غانكمل
معاه حياتي ( شافت فياوقالت بزربة ) كريم نهار تلوات ليا رجليا بقيت طايحة الارض
تاهزيني واحد بلمطور قالي غايعاوني و غايديني لسبيطار ساعة داني للخلى وتكرفست
عليا .. دارت يديها فمها وامطرت الارض بدموع ..
رجعت راسي
لور كأني كنستقبل صدمة لكن داخلي نار فرحة شاعلة فيا..، درت يدي فظهرها ابتسمت
وقلت : وانا غنبقى على عاهد لي عطيتك..
سكتات
للحظة وهي كتشوف فيا وبدون سابق انذار عنقاتني وبكااات تفزكات ليا حوايجي .
خوات عليا
قلبها وخوات عينيها من دموع بعدما تهدنات مزيان ،عطيتها كلينكس مسحات دموعها
ودعتها وقبل ماتمشي قالت : كنتي كتبان بحال ابليس غادي على رجليه كنت غالطة فيك
بزااف الكريم وحياتي لغاندوز معاك انولي كل صباح تفيق نقولك سمحلي هذا عاهد مني
...
ابتسمت
فوجهها وكي عطاتني بظهر ماقدرتش نتحكم فملامح وجهي ضحكت ضحكة لو شافني شي حد فديك
لحظة نحلف عليها تايهرب ...
تاصلت
ببراهيم واول جملة قلت : لعب دراري ماعدي ماندير بيه ..
سرط ريقو
كأنه فهم قصدي وقال : ماتخاف والو اسي كريم انا واجد غي جي راني كنتسنى فيك ..
دخلت
للقهوة وبركت حداه وبدون سلام ولا كلام مد ليا ملف خضر ،شديتو حليتو وغانشوف جوج
وراق نظرة لولة فهمت انه "رابور" على عزيز مول اتاي ، معاش كيفيق امتا
كيخرج وكيدخل فاش خدام نمرتو واهم سميت والديه وسميت جدودو كانوا معلومات كافيين و
وافيين للبلاني قادم ..
وقف براهيم
وقال : دابا نقدر نمشي فحالي ..
شفت فيه
بنظرة باردة وقلت : ريّح ..
بديت نقرى
وكنحاول ناخذ الاهم نقط ، سميتو عزيز "اسماء والديه"عمر 34 عام عندو شركة
ديال "كابلاج" وعدد لا يحصى من الاملاك من فيرمات وديور والخ .. غي
املاكوا شادين نص ورقة .
كان مزوج
من مراءة سميتها سميرة بنت "فلان وفلانة" وطلقها وعندو معاه ولد سميتو
ياسين" اما الان فخاطب بنت سميتها سارة وكل عشية فكل نهار كيهزها فطومبيل
امشيو اتعشاو ، عايش مع واليديه فنفس عنوان لعطيتو ومرة فسيمانة كيشوف ولدو نهار
لحد ادوز معاه نهار ...
قلت وانا
كنشوف فوراق : هادي لكيتعشى معاها ديما واش كيديها معاه لدار ولا كيديروا شي حاجة
فطومبيل ..
قال :
بحالاش ؟!
قلت : راك
فمهتي معنى .
قال : لا
من غير سلام حناك مني كيطلقاو او مني كيتفارقو او بعض مرات اغفلها وابوسها اما شي
حاجة بيناتهم ماعرت أنا بعدا عمري شفتهم ..
قلت :
اغفلها ممم .... هاد ولد لي سميتو ياسين كيبان ليك عزيز عليه بزااف ؟!
شافيا وقال
: بعد من دري ماعندو تاذنب ..
شفت فيه
وانا مخنزر بدون مانهدر ، ماقدرش اشوف فيا حنى راسو فخوف وبصوت مرعوب قال : كيبان
عزيز عليه فلحد لي فات دورو مزيان وكان فيما دري اطلب شي حاجة اشريها ليه ومني
كتجي مو فلخر نهار ديه كيبكي حيث كيبغي ابقى مع باه كثر ..
سديت ملف
وحطيتو فوق طبلة
شعلت كارو
وبقيت ساهي كنفكر للمدة مكانش بلقصيرة ، خديت ستيلو من عند براهيم وحليت ملف خديت
منو دوك وراق نشرتهم فوق طبلة وكتبت فملف شي سطورة وخدى مني الامر شي نص ساعة حيث
مابغيت نخلي تحاجة للصدفة كنتأكد ونعاود نتأكد ، وقبل مانعطيه للبراهيم قلت : واش
نمرة لعندك بلكونطرا ؟!
قال : لا
خديتها غي من حدى جامع .
قلت : غدا
غاتوقف عليه مني اكون مع ولدو وتعطيه هاد ملف ..
مديتو ليه
وكي شدو وقراه سيد وجهو صفار و شافيا بنفس ملامح ديك الهام لبكات قبل ماتقول انها
فقدات عذريتها وقال : قْتّلنِي ..
***********************************
