جزء التامن : كريم

جزء التامن : كريم

 اكتمل ديك نهار قمر وجدت جميع مستلزمات طلعت لسطح بليل وكان جو غائم ومظلم

درت نفس عملية طفات لي شمعة تاني وطلع ايزار وبان داك مخلوق تحتو بقيت متردد واش نحيد ايزار ولا نتراجع ، استجمعت قواي وقربت لعندو ومع خطفت ليه ايزار بان ليا بحال ظل اختارق لباب بسرعة وخرج حليت باب ومالقيت والو ، مافهمتش ؟ كنت كنتاظر كثر من هادشي فبقيت فلبيت الى ان داني نعاس ...

لغد ليه نزلت لدار وفطرت وهو ادوق عليا خالد قالي يلاه غانمشيوا مع دراري لبحر وافقت ومشيت معاهم داز نهار زوين وبقينا تما تال سبعة دل عشية كنت معول نبقى معاهم تا نمشيوا مجموعين لكن فاجئني اتصال من عند واليدة قالت لي بصوت متقطع جي دابا راه ختك فسبيطار .. عرفت من صوتها انها كتبكي
انا : مالها ؟
واليدة : ماشي وقتو طير دابا راه باك كيتسناك (وعطاتني عنوان)

تخلطات لي صدمة بلبكية اي حاجة الا ختي صغيرة ، ضربتها بجرية لأقرب طاكسي واخا ماعنديش فلوس كافيين الا ان مول طاكسي مني شاف حالتي تعاون معايا ووصلني بسرعة ..

دخلت استقبال وعطاتني موظفة رقم غرفة وقالت لي راه فقسم مستعجلات مشيت لتما ، وشفت واليدة باركة فأرض و غارقة فدموعها وواليد دافن وجهو فإيدوا فحسيت بشي حاجة خايبة وقعات لختي ..

بركت حدى واليدة لعنقاتني وهي كتبكي بحرقة سولتها مال ختي قالت لي : دخلات اولدي خير وسلام لدوش باش تغسل حتى سمعت غواتها حليت عليها باب وشفت وجهها كولو محروق ولحم كيطيح منو تلفت وماعرت ماندير عيطت لباك لجا دغيا وهزينها لسبيطار وفطريق بقات كتحلف لينا بلي سطل تهز بوحدو وتخوى عليها .

ماقدرتش نحبس دموعي وجاني داك شعور بلي انا مُلام .. تسنينا حاولي ساعتين ، خرج طبيب لدار ليها عملية وقالينا بلي عندها حروق من درجة تانية وغاتحتاج لعملية تجميل ، هي تحت تأثير مخدر ومانصحكومش تشوفها دابا .. بدات كطلب فيه واليدة وعطانة خمسة دقايق غي نشوفها ونخرجوا فاش دخلنا .. كان ابشع منظر شفتوا فحياتي ولحد الان مني كنتفكرها صورتها كتبان لي قدام عيني .. كان وجهها كولوا ملوي بفاصمة وعامرة بدمايات مخلين غي نيف لخاشين فيه دوك انابيب باش تنفس ، واليدة ماقداتش تصبر وسخفات لينا فهزوها لغرفة مجاورة ..

خرجت انا وواليد لقاعة انتظار شوية ضرب راسو بحالا تفكر شي حاجة وقالي غاتمشي دابا لدار راه مع تلفة ماعرت واش سدينها ولا خلينها مدرعة وبقى تما تا نصوني عليك .. عطاني ساروت ومشيت ..

وصلت لدار لقيتها محلولة دخلت وسديت عليا ضربت طلة عل لطواليط لكانت مزالة عامرة بدميات فبديت كنسيق فيها .. شوية سمعت شرجم تحل وهو تردخ عل جهد قفزت وحسيت انني ماشي بوحدي فدار .. سديت شرجم و جبت مانطتي وتكيت فبلاصتي فزاوية سداري فلبيت صغيرة وخليت ضو شاعل ..

تفكيري كولو فختي وفواليدة و قوة اسئلة كتضارب فدماغي واش داكشي لدرت هو سبب ؟ جبدت تليفون وحليت فيس لبنت وبان خاليجي مكونكطي قلت ليه بلي درتها وصدقات لكني من ناض جني حيدت ليه ايزار
قالي : يالطيف يالطيف .. ليش ماسمعتي نصحتي داك مخلوق ليس من جن بل شيطان لقد حررتيه
قلت ليه : لكن تا قلتي لي بلي كلمات هي اللغة جن ؟ و بعد لحظات مبقاتش كتبان لي بلاصة فين كنكتب ميساجات عرفت ان لكلب بلوكاني ! ..

بقيت حاصل لراسي كنتحسر .. الا عودتها لواليد فغادي نزيد نقودها عليا واليدة وختي انا سباب فداكشي لجرى ليهم ، ترونات نفسيتي و عضيت صباعي ندما .. تزير عليا حال وبغيت نقضي حاجتي مشيت لطواليط وقضيتها و مخلي بابها محلول رجعت لبلاصتي لكن تصدمت ملي شفت ضو ديال بيت صغيرة طافي رغم اني خليتو مشعول بقيت متسمر فبلاصتي شوية مشيت لجهت لبيت وحاول نقنع نفسي بلي غي نسيت وطفيتو ... حاولت مرار نشعل ضو لكن مابغاش اشعل وفاجعة مني بان لي شيحد ناعس فبلاصتي كان شوية ضو داخل من شرجم فقربت لبلاصتي وانا كنقرب كنزيد نتأكد بلي كاين شي حد .. مديت ايدي وخطفت مانطا بزربة كانت بنت صغيرة وجهها كولوا زرق وعورقة خارجين منو و ناعسة على كرشها غي شافتني وهي تغوت .. تخلعت و طحت لرض ناضت هي كتجري وخرجات من بيت مرة نسمع غواتها فلكوزينة ومرة فصالون ومرة فلبيت لأنا فيه .. بقيت كنردد فقرآن وانا كلي كنترعد وهي كتزيد فغواتها حتى قلت : اش بغيتييي ؟ .. سكت داك صوت وبديت كنسمع خطواتها كتقرب لعندي دخلات لبيت بهدوء ومع ضو لداخل من شرجم بان ليا غي نصها لتحتاني لمفهمتش واش هادوك رجلين ولا ايدين نطقات بنفس صوت ختي وقالت : شنو تا بغيتي ؟ .. ماعرت مني جاتني هاد شجاعة حتى نضت وحاولت نقرب منها بدات هي كتراجع الى خرجات من لبيت وبعد ثواني دخل عليا دري صغير وقصير وجهو كحل بلكاد قدرت نشوف ملامحو ،برك فزاوية بيت وكان عاطيني بظهر قلت : شكون تا ؟ قالي : انا ملك (شِيّطُو) حاكم قرائن ناس الا مخرجتوش من ارضي فانتظرو ويلات ..
ومع بغيت نطق بكلمة حتى حسيت بتصرفيقة قوية جاتني من لور فحنكي وغبت عن وعي ..

فيقني صونيط تليفون حليت عينيا وانا نلقى راسي مجبد فلكوار خارج دار وحاس بحنكي منفوخ ، جبت تليفون ونمرة لكانت معيطة ديال واليد جاوبتو : الو !؟ سبق كلامو بهاد مقدمة غريبة
قال : شوف اولدي هاد مواقف هوما فين تيبانو رجال الا كنتي غاتجي وتوقف كرجل فمرحبا والا كنتي غتبدا تغبن كشيخة فبلاما تجي .
فعلا بديت كنبكي ونتغبن وقلت ليه : ختي ماتت ياك ؟
قال : صافي بلاما تجي ..
قلت : والله تا غان... و(قطع عليا) ..

شديت طاكسي وكي وصلت لسبيطار لقيت واليد واقف عند باب جرني لطومبيل وعنقني وقالي : صبرا اولدي ماهذا غي ابتلاء وصابنا .. قلت : جاوبني دابا ماتت ؟
قال : البقاء لله مك لماتت ..

يتبع ...

تكملة قصة ==>> جزء التاسع قصة كريم