جزء السادس عشر : مخطوطة
رجعت لدار مع ربعة تقريبا دخلت كيبان لي واليد مريح فصالون وحداه قرعة لما شافيا وعاود هبط عينو .. مابغيتش نقوليه اش وقع ؟ حيث باين جاي من تما مهلوك خليتو استراح ! و دخلت لبيتي نتصت لعظامي تكونكطيت شوية وقلت اندير اخر محاولة مع مولات تعليق ! وركت على ميساج وكتبت : "الله ارحم جد جدودك لما جاوبني نبوس ايديك ورجليك غي جاوبني راني مابغيتش ندير علاقة معاك او نبقى نتبسل انا بغيت غي نعرف واش واقع لك نفس داكشي لواقع حيث هادشي لواقع والله لعظيم اتا ايسطني الله ارحم والدين لما جاوبني .."
سيفط ميساج وعاودت قريتو وعرفت اني مغاندمش عليه حيث اخر حاجة وليت نفكر فيها هي كرامتي قبل مايوقع لي هادشي كنت كنحس براسي انا واعر وكنقول عمري نطلب اي واحد ولا نتملحس على شي بنت تصاحب معايا كانت اعز حاجة عندي هي نفسي ماطيحش لأرض لكن بشر ضعيف فاش حسيت براسي قريب نموت بصراحة بانت حقيقتي وليت فحال كلب ...
بقيت كنتسنى تجاوبني ولا غي طلع لي vu و والو لعشية كاملة وانا عاصر تطاح ظلام وذن مغرب صليت فجامع وعاودت رجعت لدار بقيت غي مريح كندوز وقت بتسبيح وكنتفكر لحالة لدفنت فيها ديك ميتة بقيت كنضحك غي راسي وشوية كنقلبها بكى وكنصرفق راسي بجهد وكنقول فيق راك غي كتحلم حسيت فعلا اني بديت كنحماق ...
شوية سمعت صوت من تليفون طليت فميساج وماعرت لاش حسيت بلفرحة واخييرا جاوبتني طليت على ميساجها كنلقى { قال رسول الله صلى الله عليه وسلم : (لا تجعلوا بيوتكم مقابر ان الشيطان ينفر من البيت الذي تقرأ فيه سورة البقرة).}
قلت ليها راه طلقنا سورة بقرة لمدة ثلاث ايام لكن الامر بقى كيتردد
قالت : اذن هوما ماشي شياطين بل اموات !
تفاجئت اموات ؟ قلت : كيفاش !؟
قالت : اول حاجة متعاود لتا واحد اش طرى لك وماتخلي تاواحد اقيس مدفونة او اي حاجة تعطات لك منهم
بانت ليا سيدة عارفة قلت : ولكن شنو مدفونة ؟
قالت : اش تعطى لك ؟
قلت : مخطوطة
هنا طلعات لي vu ومجوباتنيش تاداز تقريبا نص ساعة ووذن عشى مشيت لجامع صليت ومزال مارجع لفقيه كان غي داك إمام هو لكينوب عليه ..
رجعت لدار ومع بغيت نخشي ساروت سمعت خطوات طالعين بزربة جهت سطح شداتني رهبة وقلت باينة رجعوا ، حليت لباب دغيا دخلت وسديتو بجهد بقيت كنتعوذ من شيطان رجيم مشيتي لبيتي سديت عليا طليت فتليفون كنلقى ميساج من عند ديك بنت كاتبة لي : سمحلي مانقدرتش ماعرفتش كيفاش غانشرحها لك !؟ راني عاد راجعة من جلسة نفسية ومكنعسش غي بدويات لنصحك بيه اخويا لحاجة لتعطات لك منهم ماخاص تاواحد اعرف انها عندك وسمحلي والله اعون ...
كتبت لي ليها غي عاودي لي اش طرى ليك الله ارحم لك والديك ! وركت على envoyer حتى كطلع لي echec فهاد لحظة حسيت بكاع بيبان تسدو فوجهي قربت تليفون لفمي وقلت : علاش بلوكتني يابنت ل... وبديت نسب وندفل على تليفون كاع لغضب لفصدري خرجتو من فمي دخت فهاد لحظة وشداتني تلفة ماعرفت ماندير بقيت غي كنقلب فعيني وشاد فشعري بحال شي مسطي علاش كيوقع لي هادشي ؟ علاش بلوكاتني مالني اش درت ليها ؟ !
حسيت براسي بوحدي ، منبوذ تاحد محاملني ، كنحس بلحكرة وعارف ان لجاي ايكون خيب من لي فات تقبض ليا قلبي وحسيت فعليا ان موت قربات ،
، جاتني نوبة بكاء ماقدرتش نحبسها بديت نبكي بحال شي دري صغير ، من كثرة دموعي ولاو كيوصلي فمي كنسرطهم كانوا مالحين بزااف تكيت ودموعي فزكو مخدة كنت مهلوك ونعاس فعينيا ، ماعرفت انا وقيتة نعست مغاضربني فيقة غي مع شي صوت فايت لي سمعتو طليت فساعة ديال تليفون كتبان لي ثلاثة واول صوت دخل فوذني وسط هاد ظلام كان كيقول ( غفر ليه ، غفر لبه شهد ا امين شهدا امين قول اشهد ان لا اله الا الله واشهد ان محمدا رسول الله ... )
يتبع ...
